’t verhaol achter de Worteletruuj
Ik neem óg mei truuk in d´n tied nao ´t jaor 1958/1959. Wie zoog in det jaor de Vastelaoveskalender van de Wortelepin d´r oet?
Op 18 november 1958 vónd de ierste zitting van ’t seizoen in zaal Harry Arts plaats waobeej Prins Frans I aafscheid noom. Ouk woort aafscheid genaome van Sirremoniemeister Louis Houben. Dae zelfde aovend woorte nege Vastelaovesliedjes geprissenteerd aan ’t publiek. Winnaer woort Giel Geurts.
Op 15 jannewari 1959 vónd in zaal Sander van Deurzen ’n zitting plaats waobeej Wiel Schell as nieje Sirremoniemeister woort geïnstalleerd. Taeves kós gruuets waere aangekóndig det de nieje hoeëgheid gebaore waas.
Op 22 jannewari 1959 vónd ’t traditionele Pellerienkesbal plaats in zaal Juliana. Pellerienkes kump aaf van ’t Franse woord pelerine wat ouk waal pelgrim beteikent en dit is ’n verwiezing nao de schouwermantels die pelgrims in de middelieëwe droge.
Op 25 jannewari 1959 is in Tivoli de Prinsebal waobeej Hay II Cuppen woort oetgerope as nieje Prins.
Op zóndaag 1 fibberwari waas de receptie.
Op zóndaag 8 fibberwari vónd de Groeëte Bliëricksen Optoch plaats.
Op dinsdaag 10 fibberwari vónd de Kinderoptoch plaats.
De Groeëten Optoch woort drök bezóch in taegestelling tot de Kinderoptoch. Al met al waas 1959 ’n biezónder meujlik jaor veur de Wortelepin. Binne de vereiniging waas d’r dök ’n meiningsverschil en de sfeer waas grimmig. In de lejevergadering van 15 april sprook Vors Carotius met de volgende wäörd de leje toe: “Meujlikhede zulle d’r altied blieve binne ’n vereiniging, maar dees kinne mekkelik waere euverwónne as d’r ’n goje en vrindschappelike sfeer heers. Det neet idderein ziene zin kin kriege is begriepelik, en ouk det d’r foute gemak waere, dóch ’t is absoluut verkierd um heej op te gaon agere! Heejmei bewies se dich zelf en de vereiniging gen deens. Per slot van raekening zien weej allemaol lid um de Vastelaovend in Bliërick op te bouwe en neet um deze aaf te braeke!”
De minder drök bezóchte Kinderoptoch waas de aanleiding um ’t programma veur de Vastelaovend van 1960 aan te passe. De Kinderoptoch woort verplaats van d’n dinsdaag nao de maondaagmorge. ’n Delegatie van ’t bestuur, de Technische Kemissie en de Optochkemissie zien beej mekaar gaon zitte um iets niejs te bedinke veur de Vastelaovesdinsdaag. Oetintelik bedach men ’t symbool van de Bliërickse Vastelaovend de Worteletruuj. Op dinsdaagmiddaag woort ‘ne Vastelaoves-taptoe georganiseerd, waobeej inkele meziekgezelschappe van ’t Lambertusplein door de straote trokke richting ’t St. Hubertusplein. In deze stoet lepe alle Vastelaovesvierders mei met kaetelmeziek. Op ’t St.Hubertusplein woort as aafsloeting van de dreej dolle daag de Worteletruuj veur d’n ierste kier geofferd as teike det de Vastelaovend veurbeej waas.
Door de jaore haer haet ’t tafereel van Truujverbranding op verschillende locaties plaatsgevónde. Op ’t Hubertusplein, Lambertusplein, Schepenerplein, aan de Maas en noow sinds inkele jaore op ’t kerkplein.
’t Make van dees póp waas en is nog steeds jaorliks ‘n groeëte oetdaging. Woort de póp in de beginjaore gemak door de Technische Kemissie van de Wortelepin, gebeurde det in de jaore 70 en 80 door Sef Dael in de Nieuwekampstraot. De póp woort in de woeënkamer gemak en bewaard en ’n paar daag veur de Prinsereceptie nao boeëte gehaold en nao ’t centrum gebrach. Nao de Prinsemis woort de Truuj dan aan ’t pliesieburo op de Kloeësterstraot opgehange wies Vastelaovenszóndaag.
In de jaore negetig is de Truuj ouk nog inkele jaore gemak beej Paul Dückers. Medio jaore ’90 noom de Technische Kemissie dit euver en noow wuurt al minnig jaor de póp gemak in de Optochhal.
’n Belangriek jaor veur de Truuj is 1974. Gerrit Gommans wuurt Prins van de Wortelepin. In detzelfde jaor rich Gerrit ’t Fonds Sociale Aktiviteite op. ’t Doel van det fónds is um Vastelaovesaktiviteite te bevordere veur börgers die door ziekte, handicap of alderdóm zónder hölp neet mei kinne doon. ’t Fónds haet in samewerking met de Wortelepin in 1974 veur d’n ierste kier ’t Groeët Gala Worteletruuj georganiseerd. Hoeëgtepunt van dezen aovend waas de oetreiking van de Worteletruuj door ’n ónaafhankelike jury aan minse of organisaties die zich op biezóndere wieze hebbe ingezatte veur ’t bevordere van ’t welzien van de minse. In de beginjaore woort de pries dökker oetgereik aan mierdere landelike en regionale bekinde persoeëne en organisaties.
De aafgeloupe jaore vind ’t Groeët Gala Worteletruuj plaats in de vorm van ’n galadiner en wuurt de pries oetgereik aan ’ne lokale persoeën of ‘n organisatie die zich inzet veur ’t welzien van de minse en met name de minder bedeilde.
Weej schrieve dan ’t jaor 1975. Raodslid Frans Tomlow geit ’n vaere reis make nao ’n geemigreerd femilielid. Beej ’t station in Venlo wuurt hae op oetbundige wieze oetgezweid door ’n aantal vrouwe. Dit veurval is de aanleiding veur de organisatie van d’n ierste Truujendaag in Bliërick Op 26 fibberwari 1976 vind dan ouk d’n ierste Truuje aovend plaats. Dit wuurt door de jaore haer ’n doorslaond succes, waobeej op d’n dónderdaag veur Vastelaovend doezende vrouwe oet hiel Limburg zich nao Bliërick begaeve veur ‘ne geweldigen aovend zónder manne.
Taegewoordig vind d’r nog steeds ’n Truuje aovend plaats in ’t Raodhoes. Doezende vrouwe zien d’r neet mier, maar de gezelligheid die is nog waal altied gebleve.
As Vastelaovesvereiniging de Wortelepin zien weej gruuets det ós symbool de Worteletruuj door de jaore haer nog altied naodrökkelik aanwezig is binne ós vereiniging. In 2024 kreeg de Truuj nog ’n moeëje blievende herinnering in de vorm van ’n Truujebeeld op ’t Laurentiusplein.
Vanaaf 2025 wuurt jaorliks op d’n dónderdaag veur de Vastelaovend ‘n Truuj oetgerope. D’n ierste kier waas dees ier veur Resy Lucassen-Wolters. De Truuj geit mei in de Groeëten Optoch en speult op Vastelaovesdinsdaag ’n prominente rol. Met ‘t traditionele Truujverbörre op Vastalaovesdinsdaag wuurt d’n Bliërickse Vastelaovend aafgeslaote. Óndanks de tiedsgeis en veranderinge in de maatschappij blief De Truuj nog steeds uniek en ’n markant symbool in d’n Bliërickse Vastelaovend.
As ierbetoeën aan dit unieke symbool is ’n prachtige documentaire gemak
Want ós Bliërick det zal noeëts vergaon zoeëlang de Wortel en de Pin bestaon!