Groëtmeister in de Orde van ’t Bliëricks Hert

Vastelaovesgezelschap ‘de Wortelepin’ verliënt aan persoëne die vuuël gedaon hebbe veur Bliërick in ’t algemein of in ’t biezónder ’n ónderscheiding in de “Orde van ’t Bliëricks Hert”.

Euver de ónderscheiding en de beteikenis van ‘t hert kin men ‘t volgende vertelle: Bliërick haet in ‘t verlaeje oeits beej de gemeinte Maasbree behuuërt en aan dees gemeinte is in 1853 ‘t waope verlieënd: ‘n gevleugeld hert met ’n sommé van ’n kruuts tösse de hoornen. Ouk in de Bliërickse vlag zuuët men ‘t hert truukkómme

De persoëne die de ónderscheiding in de Orde van ‘t Bliëricks Hert óntvange, hebbe ’n jaorelange of ’n biezóndere beejdrage op sociaal, maatschappelik of vastelaoves vlak in of aan de Bliërickse gemeinschap geleverd. Dees ónderscheiding symboliseert ouk det de mins die dees ónderscheiding óntvingk, zien hert veur Bliërick op de goje plek haet. De Groëtmeisterónderscheiding kin beej bevordering waere verlient.

De Orde besteit oët ’n um de nek gedrage medalje, met ’n aafbeelding van ’n hert met ‘n kruuts tösse de hoornen. Dees medalje is in zilver veur Meisters en in góld veur Groëtmeisters. Verder óntvingk de kersverse meister of groëtmeister ’n oorkonde waorin de beneuming en de motivatie wuurt opgeteikend.