Wae had det in 1947 kinne bedinke det anno 2025 Vastelaovesgezelschap “de Wortelepin” ‘t 7 x 11 jäörig jubileum zoel viere? In 77 jaor en ouk nog daoveur is d’r hiel wat gebeurd. ’n Truukblik op de roemruchte geschiedenis van ós vereiniging.
Veur de oprichting
Vanaaf umstreeks 1900 woort in Bliërick al Vastelaovend gevierd, maar det waas nog neet in georganiseerde vorm zoeëas weej det noow kinne. Met de Vastelaovesdaag trokke de Bliërickenaere met maskes op en sóms verkleid richting ’t centrum. Dezen tied woort veural gekinmerk door ermood.
Op Vastelaovesmaondaag woort in d’n Bookend en op Vastelaovesdinsdaag in ’t centrum van Bliërick de Transvaalse Boerenoorlog naogespeult. De Bookendse speulde de Transvaalse Boere en de Bliërickenaere de Ingelse militaire.
Dit ware de ierste schermutselinge róndum de Bliërickse Vastelaovend.
Begin jaore dertig woort de Jonggezellenclub oet de Baoldersestraot opgerich. Deze groep jóngere trok in 1932 met ‘ne wage vanoet de Baoldersestraot richting ’t centrum. Later in de jaore dertig trokke zeej nog twieë kier door de straote met ‘ne wage met ’ne groeëte Wortel.
Feitelik kin dit tafereel d’n ierste ónofficiële Optoch van Bliërick geneump waere.
D'n aanleiding
Op 10 mei 1940 vele de Pruuse Bliërick binne en brook ‘ne ónzekere tied veur de bewoeëners aan. Naomate d’n oorlog vorderde woort Bliërick steeds mier ’n vesting vanwaege de aanwezigheid van de brök euver de Maas. Op 3 december 1944 woort Bliërick door de 44e Schotse Laagland Brigade ónder leiding van generaal Coming Bruce bevrijd. Dees bevrijding zoel de geschiedenisbeuk ingaon as de “Perfect Battle of Blerick”. ’t Deurde nog wies 1 maart 1945 veurdet aan alle oorlogsellende ’n ind kwaam. De Bliërickse bevolking kós daonao weer beginne aan de wederopbouw. Doordet men veer en ‘n half jaor ónderdrök waas gewaes kwaam d’r steeds mier behoefte um weer leuke dinger te gaon doon en ’t laeve te viere. Zoeë woort d’r ’ne Bevrijdingsoptoch georganiseerd en ging revue gezelschap De Flarussen weer veurstellinge opvoere. Zoeë woort in april 1947 de jubileumrevue “Dao geiste haer” opgeveurd. As slotscene van de revue woort ’n Vastelaovesvereiniging opgerich en ‘ne Bliërickse prins oetgerope. In de zomer van 1947 besloot ’t bestuur van de Bliërickse Hockeyclup ens gedachtes oet te wissele euver ’t oprichte van ’n eige Vastelaovesvereiniging. Directe aanleiding heejveur waas de veurstelling van de Flarussen. Alle Bliërickse vereiniginge woorte oetgenuuedig en tiedes ’n vergadering beej kefee Lex Gubbels woort beslaote det de Vastelaovesvereiniging de naam “Wortelepin” kreeg. Dae zelfde aovend kós ouk ’t dageliks bestuur geprissenteerd waere.
De naam Wortelepin is aafgeleid van ’t feit det de Bliërickenaere al hónderde jaore deze beejnaam hadde. Umstreeks 1569 voerde d’n Hertog van Alva (Fernando Alvarez de Toledo) in Nederland belasting in. Idderein dae veldvruchte had meus tien procent van de vruchte die baove de grond greujde aafstaon aan de Spaanse euverheersers. De verhaole gaon det de slumme Bliërickenaere wortele ginge verbouwe umdet die in de grond greuje en zeej dus gen belasting verschöldig ware.
De officiële oprichtingsdatum van de Wortelepin waas op 3 november 1947.
Dn ierste zitting en Prins
´t Nieje bestuur ging metein veurtvarend van start en vergaderde ´n waek later op d’n Horsterwaeg. Tiedes de vergadering woorte 11 minse geselecteerd veur de Raod van Elf en ´ne Sirremoniemeister gekaoze, d’n hier Louis Houben. Later daen aovend woort ´t programma veur de ierste zitting doorgenaome en Jan Driessen nao veure geschóve as ierste Prins van de Wortelepin.
Op 8 jannewari 1948 vónd de ierste Zitting plaats in Royal Irene. Tiedes dees zitting woort de Raod van Elf en Sirremoniemeister officieel geìnstalleerd. Hoeëgtepunt van d’n aovend waas ´t door Annie Renkien gezónge nummer De Wortel en de Pin. Dit nummer, geschreve door Louis Baets, is nog steeds ´t introliedje beej alle Zittinge van de Wortelepin.
Op 2 fibberwari 1948 in zaal Apollo woort Jan I Driessen as ierste Prins van de Wortelepin oetgerope met zien adjudante Piet Bol en Karel Joordens. Detzelfde jaor woort Toeën Zumdick, oetbater van Royal Irene en stadsprins oet 1936 van ’t heropgerichte Jocus, Vors Carotius van de Wortelepin. De naam Carotius aafgeleid van het Latijns carot wat wortel beteikent waas verzónne door de Sirremoniemeister.
De Wortelepin door de jaore haer
In 1948 kwaam ouk d’n ierste Wortelegaejer oet en trok d’n ierste Optoch door de Bliërickse straote. Vanwaege de watersnoeëdramp in Zeeland en Zuid-Holland ging de Vastelaovend in 1953 neet door. In 2021 en 2022 waas de coronapandemie de spelbraeker en ging de Vastelaovend in georganiseerde vorm twieë jaor neet door. Vanaaf 1958 woorte de ierste Jeugprinse oetgerope. Twieë jaor later in 1960 vond de ierste Worteletruuj verbranding plaats. De Worteletruuj is de beschermvrouw van de Bliërickse Vastelaovend. Op Vastelaovesdinsdaag wuurt traditioneel de Truuj verbrand as boetedoening veur alle ónrechmatighede die tiedes de dreej daag zien begaon. In 1976 vónd d’n ierste Truujedaag plaats. Traditioneel zette de dames op dónderdaag veur de Vastelaovend de bleumkes boete. Prins Gerrit I Gommans richte ’t Fonds Sociale Aktiviteite op. Vanaaf 1974 waere jaorliks ein of mierdere laureaten oetgerope en ónderscheide met de Worteletruuj tiedes ‘ne speciale Gala-aovend.
De Bliërickse liedjes kriege vanaaf 1961 ’n prominente plaats en waere dan jaorliks op EP, LP, CD en noow op Spotify gezatte. De rieke Bliërickse liedjesgeschiedenis haet vuuel zengers, zangeresse en componiste veurtgebrach. Jaorliks waere de veer beste nummers tiedes de Liedjesaovend bekint gemak. De winnende componiste en teksschrievers waere beloeënd met de Giel, verneump nao tekschriever en Ald Vors Giel Geurts. Nummers as De Wortel en de Pin en Straks is ’t weer Aswoensdaag waere wies vaer boete Bliërick meigezónge. Sinds 1948 waere al ós zittinge opgeluusterd door de hofkapel. ’n Aantal leje van Hermenie St.Caecilia vormde in ierste aanleg ’t orkes “de Wortelegaejers” wat later medio jaore zeventig de naam Hofkapel kreeg. De huidige begeleidingsband van ós zittinge is Blaoskapel Judaska.
Wao in de beginjaore ’t Vastelaovesprogramma bestónd oet ’n zitting, ‘ne prinsebal en ‘ne optoch is det door de jaore oetgebreid met diverse zittinge veur jónk en ald, zoeëas de hiere- en dameszitting óntstaon in 1990. De Groeëten Optoch op Vastelaoveszóndaag is ein van de jaorlikse hoeëgtepunte van de Bliërickse Vastelaovend.
Dn toekóms
Nog altied wuurt door de Wortelepin ’n kwalitatief Vastelaovesprogramma van hoeëg niveau geprissenteerd. De intentie is um ouk in de toekóms dees evenemente te kinne behalde. Door de truukloup van ’t aantal horecagelegenhede in en róndum Bliërick zal ’t ‘n oetdaging zien um de Vastelaovestrein door Bliërick te laote loupe. In ’n snel veranderde maatschappij zal de Wortelepin ouk mei mótte gaon waobeej kwaliteit en traditie behalde zulle blieve. Weej zien euvertuug det d’r ouk weer nieje initiatieve zulle kómme en det ós top evenemente wao ónder de Groeëten Optoch, Swaree, de Zittinge, ’t Gala en de Liedjesaovend euver 11 jaor nog altied in Bliërick op ’t programma staon.
En ós Bliërick det zal noeëts vergaon zoeëlang de Wortel en de Pin bestaon!
