De Giel

Vastelaovesgezelschap ‘de Wortelepin’ haet ‘ne nieje trofee, ‘de Giel’ geneump, in ‘t laeve gerope. ‘de Giel’ is ‘ne wisseltrofee dae idder jaor zal waere oetgereik aan de winnaar van de Liedjesavond. Dit door de Tegelse beeldend kunstenaer Huub Rossel óntworpe en gemakde kleinoeëd zal gedurende ein jaor op de kas prieke beej de makers van ‘t beste Vastelaovesliedje van det jaor beej ‘de Wortelepin’.

‘De Giel’ is geneump nao Giel Geurts (1927 – 2013). Van 1976 wies 1988 Vors Carotius IV beej Vastelaovesgezelschap ‘de Wortelepin’. Giel Geurts waas ‘ne aimabele man met ‘n passie veur zien funktie als Vors-voorzitter, veur de Vastelaovend, veur ‘de Wortelepin’ en zeker veur de Vastelaovesmeziek. As charismatisch leider van de vereiniging goof hae ‘de Wortelepin’ en de Vastelaovend zien plek in de Bliërickse samelaeving. Bevloge, met eige ideeën, begaafd spraeker, altied korrek, verloor hae noeëts oet ‘t oug det ‘t um Vastelaovend ging. Zoog zien vereiniging greuje tot ein van de bepaolende in de Bliërickse samelaeving, met ouk ‘ne goje naam in ‘t Limburgse Vastelaoveswaereldje.

Én netuurlik waas en is Giel Geurts ónlosmakelik verbónde met ‘t liedje ‘Straks is ’t weer Aswoensdaag’, waomei hae same met Tiny Hofman in 1974 ein veerde plaats bereikte, beej iddere Vastelaovesvierder zier zeker bekind. Minder bekind is det Giel Geurts in de jaore 60 en 70 vuuel mier liedjes haet geschreve veur de Bliërickse Vastelaovend.