Prins Sander

Ik meug waal zegge det ik ein echte mazzelvot bin as ’t geit um vastelaovend. Ik bin namelik 44 jaor geleeje gebaore en getaoge in ‘t ‘Vastenavondkamp’. Doornaeve bin ik gebaore op 17 december, dezelfde datum as Toén Hermans (Mien waar is mijn feestneus?). Heej is de basis gelag veur mien leefde veur vastelaovend, det kin neet anders. As kleine Sander makte ik van krantepepaer ’n prinsemuts. Ik kin mich nog herinnere det ik in 1988 nao de carnavalsbal van de Roncallischoél ging verkleid as prins. Beej de Wortelepin regeerde toen prins Leo I en de adjudante Joop en Jenne. Mit vuul bewondering keek ik nao dees 3 manne. 

Cassetjebendje

As zelfverklaorde prins trok ik door mien eige slaopkamer en speulde ik det ik prins waas van mien eige riék. Al vruug probeerde ik tekste te schriéve en teikeninge te make. Van mien oma Crompvoets kreeg ik in 1990 ’t cassetjebendje ‘Spooje is gauw gedaon’. Heej stond ’t liedje ’t kerkepäörtje op. Ik kin mich herinnere det ik dees liedjes griés heb gedreid. Mien interesse in ’t fees en de organisasie dao van woort mit ’t jaor sterker. Op Stadsumroop Venlo keek ik altied nao de oetzendinge van ’t Swaree en de Hofbal. En netuurlik auk nao de optochte. Mit de femilie Mattheijssen ginge we altiéd op zaoterdaag nao de Poerker optoch in Hout-Bliërick kieke. ’s Aoves beej opa en oma waat aete en mit zien alle nao Stadsumroop Venlo kieke. Ik vond ’t geweldig um vastelaovend op de lokale tillevisie te zeen. Op zondaag deeje we as gezin altied mei mit SM de Witte aan d’n Bliërickse optoch. 

Carotius Juniorus

Op basisschoél de Viéfsprong (ik waas inmiddels van schoel gewisseld) werkte ik in de baovebouw dök mei aan de semesteraafsloétinge. Mei tekste schriéve en optraeje op de buun. Heej zat ik mien iërste stappe op ’t podium. Bliekbaar veel mien passie veur vastelaovend beej sommige minse op. In ’t naojaor van 1993 woort ik door Ton van Lieshout gevraog um jeugprins te waere van SV Bliërick. As Prins Sander II moch ik 2,5 waek op paad. Ik deej bliekbaar iets biezonders. Euveral wao weej kwame, vroog ik of ik waat moch zegge door de microfoon. Dit veel de Wortelepin op. In 1995 woort ik de iërste vors Carotius Juniorus van ’t jeuggezelschap. Vanoét dees rol struimde ik in 1999 door as lid van de jeugkemissie en woort ik op jonge laeftiéd offisjeel lid van de Wortelepin. Toendertiéd waas Henk van Lunenburg veurzitter van de jeugkemissie. Henk haet mich dök gesteund en geïnspireerd. Toen we mit De 3-kes startte woort Henk al vreej snel lid van ôs Comité van Aanbevaeling. Tot ziene doëd in jannewarie 2019 goof hae gevraog en ongevraog advies.

Tillevisie

In oktober 1999 kwaam ik beej umroop Venlo. Same mit Bram Holla (broor van) ging ik sketches make beej ’t jongereprogramma Tilt en meiwerke aan ’t Sinterklaosverhaol. Al snel ging ik mei werke aan oétzendinge euver vastelaovend. Ik moch liedjeswedstriede en oétroope van prinse bezeuke names de umroop. In 2003 praotte ik veur de iërste kier de Bliërickse optoch aan mekaar, same mit ald Vors Carotius Paul Vaessen. Det meug ik nog steeds doon. In 2007 moch ik auk de Poerkeroptoch aan mekaar gaon praote en sinds 2016 meiwerke aan de oetzending van de Tegelse optoch. De letste jaore hebbe we ’t programma Kefee ’t letste rundje gemak, de liedjesaovend oétzendinge en auk ein aantal documentaires euver Vastelaovend in ôs gemeinte. 

De 3-kes

In de tössetiéd ware weej mit ’n leuke groep minse auk ‘nt bouwe aan ôs eige vereiniging. In december 2001 woort op miene verjeurdaag ’t zäödje gepland veur De 3-kes. De offisjele oprichting volgde op vastelaovesmaondaag 03-03-03. Sinds dae tiéd trekke weej mit vuul plezeer door de gemeinte mit ôs Groët Venloosche Nar. Alles waat we doon, probere we te doon veur de joeks. We hebbe al vuul toffe dinger meigemak. Zoe-as de lancering van De 3-kes radio in 2009 en ‘t telkens verrasse van minse mit ôs campagnes. Doornaeve blief ’t sjiek um al vanaaf december 2001 betrokke te zien beej de begeleiding van ôzze hoégheid. Ein Rol die in al die jaore flink is gegreujd. De Nar is inmiddels ein vaste waarde gewaore in de Groët Venloosche Vastelaovend. 

Vastelaovend

Umdet vastelaovend zo’n fasinerend fees is, probeer ik dao al lang mien steinke aan beej te drage. In 2026 bin ik 33 jaor aktief in de georganiseerde vastelaovend. Heejbeej heb ik allerlei pette op meuge zette, initiatieve ontwikkeld en leuke dinger mei georganiseerd. Zoe waas ik onder andere betrokke beej Bliërick Blief Boéte, moch ik in 2009 adjudant zien van Prins Gilbert I en werkte ik mei aan ’t Carnavalsboek, van Lentefeest tot festival. Op 17 december 2015 heb ik stichting ‘Blauwe Vastelaovend’ opgerich, um aktiviteite in Bliërick mei te ontploeïe. Aktiviteite die we op dit moment organisere zien SPAN jeugtreffe, Aan de Maas en HellingTrekke. Sinds veurig jaor zien we auk ‘nt kieke nao ’t niej laeve inblaoze van ’t Truujverbörre en de dinsdaagaovend. Dit doon we onder de titel: ‘Straks is ’t Aswoensdaag, de letste drinkse in Bliërick’. Auk zien we bezig mit ein nieje documentaire euver de Bliërickse Vastelaovend. Dees is te zeen in 2027.

Communicatie

Door al die leuke funksies binne ’t vastelaovesgebeure zoelse haos vergaete det d’r auk nog gewerk môt waere. Auk heej bin ik ein mazzelvot. Door ’t prissentere, organisere, creëren en schriéve loog de keuze um communicatie te gaon studere veur de hand. Toen ik in november 2006 van schoël kwam bin ik metein gestart als zelfstandig communicatieprofessional onder de naam BLAUW communicatie. Dit combineerde ik haos 11 jaor mit ein parttime baan as communicatieadviseur beej bibliotheek Venlo. Sinds 2017 werk ik volledig als ZZP-er. De aafgelaupe jaore heb ik mich steeds mier gespecialiseerd in de thema’s veiligheid en leefbaarheid. Mien opdrachgaevers zien veural publieke organisasies.

Gezin

Tiédes ein van mien opdrachte lierde ik Susanne Franken kinne. Same hebbe weej in 2008 de äöpening meuge organisere van ’t Raodhoes in Bliërick. Inmiddels zien we 2 kinder wiejer en woéne we as gezin mit vuul plezeer op de Baoldersestraot in Bliërick. ’t Kin neet anders dan det Vastelaovend ein truukkierend onderwerp is beej ôs thoés. Ôs dochters Benthe en Janne zien dan auk besmet mit ’t vastelaovesvirus. Kômmend seizoen zitte zeej veur de 2e kier in de jeugraod van de Wortelepin. In ’t verleeje waas Benthe prinses beej de scouting Mgr. Feron en Janne mini-nar van De 3-kes. Tiédes de vastelaovesperiode zien we zoé vuul meugelik same onderwaeg um te viere.

Vrindschap

Viere det doon we auk mit vuul vrinde en bekinde. Mit name door alle bezighede in de vastelaoveswereld hebbe we hiel wat leuke minse um ôs haer. Allerlei clubkes en liéne laupe door elkaar haer. We hebbe ein gemeinschappelikke passie en det is vastelaovend bringe. Det is dan auk dök ein centraal gespreksonderwerp. Mit Joep en Paul heb ik auk al vuul meuge belaeve. Ik heb eur in 2003 en 2004 meuge vraoge um Nar van de gemeinte Venlo te waere. En in 2025 moch ik eur vraoge mei ’t trio te vorme van de Wortelepin. Gelökkig zagte zeej ‘jao’, want beste minse: ‘Prins bisse neet allein.’ Haopelik kômme d’r de kômmende waeke nog vuul vastelaovesvrinde beej. 

Sander

PS: Enne, danke desse dit vuul te lange verhaol hielemaol hes gelaeze.