Adjudant Paul

Ik bin Paul Pouwels, 4×11 jaor. Op 15 mei 1981 bin ik gebaore baove-op de Tegelse Hei.

Nao ’n jaor zien mien pap, ‘nne Blierickse Jong, Pieter Pouwels en mien mam ’n Tegels maedje Toos van Leipsig, same mit mien twieje aldere zuskes, Jennie en Loes, nao de Sinselveldstraot in Venlo-Zuid verhoes. 

Dao greuijde ik op in ’t Kwasteriek woa ik verkleid as prinske al dök op de bühne heb gestaon. Mit as hoëgtepunt in 1993 wie ik op ’t spruutjesbal van de basisschoeële de Verrekijker en de Springplank moch veurgaon as prins. 

Nao de basisschoeël bin ik nao College den Hölster gegaon, wao ik 6 jaor op schoeël heb doorgebrach. In dae’n tiëd heb ik ouk adjudant Joep liere kinne umdet weej allebei ’n vriendinke oet dezelfde vriendinnegroep hadde.

Wie ik mien middelbare schoeël diploma had gehaold bin ik gaon studere in Eindhove. Toen mien studie op ’t ind leep hebbe Prins Sander en Adjudant Joep mich gevroag um de 2de Groët Venlose Nar te waere van GVVG De 3kes. ’t Begin van ’n hiele goije en toffe vrindschap en netuurik ‘nne waanzinnige tied tiedes de vastelaovesperiode in 2005! 

Ik bin in 2010 getrouwd mit Climmy, waomei ik al sinds 2002 same bin. Op vastelaovesdinsdaag in 2009 heb ik um ten huwelik gevraog in ’t toenmaolige kefee Ald Blierick. 

Same hebben weej 3 kinder. Bo van 14 jaor en ’n twiejeling, Lynn en Jop, 12 jaor ald. Weej woeëne sinds aafgeloupe zomer op de Waterleidingsingel in de Wien en hebbe daoveur altied in de moeije Roëzekransstraot in Venlo Centrum gewoeënd.

Netuurlik vind ik ’t supertof um te zeen det ’t vastelaovesvirus ouk aan de jeug wuurd doorgegaeve en zeej d’r alle 3 idder jaor waer nao oetkieke.

In mien werkzame laeve werk ik in Remund as Consultant veur digitale oplossinge beej ’n magazien automatiserings en mechaniserings firma. Os haufkantoer leet in Oeësteriek wao ik dan ouk aaf en toe haer gaon.

Wie ik jongk waas waar ik dök in ’t Blierickse te vinde beej mien Oma die op de St. Amandusstraot woende en beej judovereiniging Judokan wao ik as jonge jong bin gaon judoë. Ik heb ’t judopak al hiel waat jaore aan de spraekwoordelike willige gehange en loup now nog hard mit adjudant Joep. Det doon ik zeker ens in de waek op vriedaagmorge um 07.00 oor beej de vruge vogels van 2run4fun. Daonaeve heb ik al aardig waat halve marathons beej de Venloup oetgeloupe.

As ik neet aan ’t sporte bin hald ik ouk van kaoke en probeer ik det ouk aaf en toe te doon beej os kaokclub. Ik gaon ouk gaer mit vrinde ’n pilske drinke of ’n lekker hepke aete.

Naeve ’t nar zien in 2005 bin ik dit jaor 7×3 jaor lid van GVVG de 3kes waovan in de beginjaore 7 jaor as vice-veurzitter. Daonaeve waas ik penningmeister binne ’t besteur, waat oa ouk oet Sander en Joep bestond, waat in 2016 in Blierick ’t BCL treffe haet georganiseerd. Det bestuur besteit now nog en mit z’n 3je organisere we sinds 2017 jaorliks ’t Zomeraovend toepe beej ’t raodhoes op ‘nn vriedaag doeën beej d’n langste daag.

Wie os altste dochter is gaon Handballe beej Handbal Venlo woord ik al snel gevraog um as Penningmeister zitting te neme in ’t bestuur. Det heb ik wies we gefuseerd zien mit HVB tot Fortes Venlo gedaon. Taegewoordig bin ik nog actief as vreejwilliger oa mit ’t organisere van de vastelaovesbal, de groëte Clubactie, beheerder van de ticketshop en as umroper beej wedstrijde van os ierste damesteam. 

Netuurlik bin ik beej ’t sporte groet supporter van os kinder en daorum ouk dök te vinde in de manege in Belvend as Lynn mot paerdrieje, naeve ’t voetbelveld in ’t Ven as Jop geit keepe of beej ’t handballe in Egerbos as Bo ‘nne wedstried haet. 

Zoëas gezag is mit Sander en Joep ’n hechte vrindschap ontstaon. Ouk os dames zien daobeej betrokke en same hebbe we al hiel waat verjäördage gevierd en komme ouk dök beejein. Inkele jaore geleje hebbe we gedach um ’t loupe te combinere mit ’n bezeukske aan de kroeg of ’n andere evenement wao se good kins stappe. En zoë is os eige wandelclub “De Stappers” ontstaon. 

Sinds 2005 hebbe weej ouk al hiel waat vastelaovesfeesjes gevierd en zeker ozze jaorlikse trip nao Kölle mit os Kölsche Funke Freunde is sinds 2006 idder jaor weer ‘n hoëgtepunt. Al jaore hadde we mit z’n 3je de aafspraok det as emus gevraog zoel waere weej det mit z’n 3je zoele gaon doon. Dao hebbe weej al hiel dök euver gefantaseerd en ouk al hiel lang nao toegelaef. In de zomer woort de vraog dan intelik aan Sander gesteld en al gauw ware weej d’r oet det we dees kans mit 3 kier 2 hand aan meuste griepe.

Ik heb d’r ontzettend vuuël zin in um in Blierick mei veur te gaon dit jaor en Same mit og dae vastelaovend te viere!