Joep
Adjudant 2
As jongste telg van Hans Holla en Riet van Mullekom gebraore op 1 april 1981 in ‘t gashoes in Tegele. Ik bin dus 44 jaor. Pap unne Venlose jong en mam ein ech Bliericks maedje. Wie ik waord gebaore woende weej op de Azaleastraot in de Klingerberg. Umdet mien mam gen ros in de vot had zien weej ein aantal kier binne Blierick verhoes en heb ik op verschillende basisschoele gezaete. De middelbare schoel heb ik op t Blariacum College gevolg um oetintelik aan de Gilde Opleidinge mien beroepsdiploma te haole.
In 2000 bin ik op michzelluf gaon woene op de Stalpaert van der Wielestraot in Blierick. Un fijn ierste huuske. In 2006 richting Venlo verhoes. Wao ik in 2012 mien Tegels maedje Evelien heb liere kinne. Inmiddels woën ik alweer 11 jaor in Tegele en hebbe weej same 3 prachtige blaage. Teun (12 jaor), Liselot (10 jaor) en Cato (6 jaor). In t dageliks laeve werk ik as accountmanager binne de medical device wereld. Det doot ik inmiddels alweer 16 jaor. In die hoedanigheid bezeuk ik ziekehuus en klinieke in zuuje van Nederland um te advisere en ondersteune op t gebied van duurzaamheid, infectiepreventie en efficiëntie op de operatiekamers.
Wie ik 6 jaor waas bin ik beej de Blierickse Herte gegaon en heb dao ein paar jaor getrommeld. Det trommele heb ik auk dôk gedaon tiedes de vastelaovend. In de kinderoptch mei maar auk beej ’t Muspelheim. Veural in 1989 waas det biezonder. Bram waas Prins van ’t mus en Gijs zoot in de raod van 11 en ik moch met de Fäös mei op de bunhe um met Neutje veur Neutje mei te tromme. Beej ‘t Muspelheim heb ik aardig wat jaore plezeer gehad. Ik heb dao auk nog op de dinsdaag en vriedaagaovend klup gezaete.
Sporte heb ik auk altied gedaon. Of ’t ech sporte geneump meug waere kinse euverigens euver twiste. In 1988 bin ik met d’n druim oets ‘t EK te winne gaon voetballe beej RKBVC in d’n Bookend. Ondanks mien talent heb ik mich door unne kammeraod laote euvertuuge det handballe vuul leuker waas en heb ik ein paar jaor beej HVB gespeuld. Echter waas ein van de 2 trainingsaovende dôk un voeltbalpötje en det waas toch ech wal leuker. Ik bin daorum toch maar weer gaon voetballe. Dit kier beej SVB. Dao heb ik oetintelik van mien 13e wies mien 30 gespeuld. Helaas bin ik toen motte stoppe vanwaege ein blessure. Wal heb ik nog wies veurig jaor kinne zaalvoetballe met de jonge van t alde 13e elftal van Blierick.
De vastelaovend lôp veur mich as unne roeije draod door ‘t laeve. De ierste stappe waorte gezatte beej ’t Muspelheim. Later allein op stap in Blierick, in de tent veur de Paerdskoel of lekker de stad in. In dees jaore heb ik adjudant Paul liere kinne. Prins Sander daorintaege kos ik al mien ganse laeve en dae vroog mich in t naojaor van 2003 of ik ’t sjiek zoel vinde iets beej de 3-kes te gaon doon. Dat woel ik wal en zoe kwaam ik in aanraking met de ideeje en ambisies van dees prachtige klup. Neet hiel vuul later waord ik gevraog um de allerierste Nar van groet Venlo te waere. Det waas ein prachtige ervaring. Wies op de daag van vandaag bin ik met vuul plezeer al 22 jaor lid van dees vereiniging.
In 2004 hebbe prins Sander en ik Paul gevraog um miene opvolger te waere beej de 3-kes umdet veuraaf al vasstaond det hae det geweldig zoel doon. Nao zien narreschap is auk adjudant Paul beej de 3-kes gekomme en zien prins Sander, adjudant Paul en ik de ierste jaore altied same ‘t gezich van dees klup gewaes. En in dae tied hebbe we dokkerctaege mekaar gezag “weej waere oeits ’t trio van de Wortelepin”. En noow is zoewied. Same met die 2 jonge veurop meuge gaon in d’n Blierikse vastelaoved, unne druim dae oetkump!
Fijne vastelaovend allemaol!