Plaetjes

‘t Ontstaon

Zoeë is ’t begós: Wat jaorelangk as wins ge-uut woort, kwaam op ‘t ind van 1947 tot stand. Bliërick kreeg ‘n eige Vastelaovesvereniging. De naam van ‘t gezelschap waas gen probleem ‘de Wortelepin’.

Al bekant veerhónderd jaor drage de Bliërickenaere deze beejnaam. Veerhónderd jaor geleje stelde Hertog Alva d’n tiënde penning in, det woel zegge, idderein meus 10% belasting betale. Taegewaordig zoel se dinke “10%, det is weinig.” Maar kós se det destiëds neet berappe dan meus¬se 10% van dien veldvruchte die baove de grónd greujde aafstaon. Die veldvruchte, houfzakelik grane, woorte opgeslage in de Tiendscheur (aan de taegewoordige Tiendstraot).

Veel d’n ougs royaal oët, dan kós me terech in ‘n reservescheur die op ‘Euverkaore’ loog tösse Hólt-Bliërick en d’n Bookend. Dit gebied wuurt nog altiëd zoë geneump. Waorum dan Bliërickse Wortelepinne? Wie gezag, Alva eiste 10% van alle vruchte die baove de grónd greujde. Toen dóchte vuuël Bliërickse linkmichels, “weej verbouwe wortele, die greuje houfzakelik ónder de grónd en dan kin Alva naor zien tiënde penning fluite.”

Maar weej dwale wat aaf. In november 1947 prissenteerde ’t bestuur van Vastelaovesgezelschap ‘de Wortelepin’ zich ónder veurzitterschap van Thei Holte. Twiëde veurzitter woort Gé Konings, sikkertaris waas Sra Donders en Funs van Avenzaath penningmeister.

Op 8 jannewarie 1948 waas de iërste zitting in Royal Irene. Heej woort ouk de Raod van Elf geïnstalleerd.

Raodsleje ware toen Sjeng Trepels, Twan Mercus, Maan Keunen, Sjeng Wekx, Wiel van Gaal, Sra Theewen, Rien Aerts, Baerke Driessen, Broer van de Schors, Harie Jansen en Frans Krieke.

Ouk waas d’r ‘nne sirremoniemeister: Louis Houben.

In ‘nne aafgelaege zaal Apollo woort op ‘t Prinsebal van 2 fibberwarie 1948 d’n iërste Prins van Bliërick oëtgerope, Prins Jan de Iërste (Driessen) met zien Adjudante Piet Bol en Karel Joordens. Toën Zundick, oëtbater van Royal Irene, zörgde d’r veur det d’n Optóch door Polygoon woort opgenaome op film. Toën woort det jaor ouk Vors Carotius van Vastelaovesgezelschap ‘de Wortelepin’.

Dankzij ‘t pionierswerk van destiëds is Vastelaovesgezelschap ‘de Wortelepin’ noow ‘n neet miër weg te dinke pilaer in de Bliërickse gemeinschap.