Liedjesaovend 2024
Liedjesaovend 2024, Vastelaovesgezelschap “de Wortelepin”
Beste zangers, zangeresse, komponiste en schrievers,
Nao ´n geweldig Vastelaovesseizoen 2023-2024 gaon weej ós now opmake veur ós jubileumjaor 2024-2025. ’t Kommend seizoen besteit Vastelaovesvereniging “de Wortelepin” 7 x 11 jaor.
De traditie van Bliërickse liedjes geit truuk naor begin jaore ‘60. In ózze rieke historie hebbe al vuuel zangers, zangeresse, komponiste en schrievers euwige Bliërickse Vastelaovesroem gekrege. Weej zien gruuets op ós liedjes en det is ouk ’n essentieel onderdeil van de Bliërickse Vastelaovend.
Gaer wille weej óch dit jaor oetnuuedige um mei te doon met de veurselektie.
Wae geit de opvolger were van “Noow we d’r toch zien” en welke komponist, schriever, zangers en/of zangeresse meuge straks de felbegeerde “Giel” in ontvangs neme?
Op zaoterdaag 5 oktober 2024 zulle oetintelik 11 finaliste gekoze door ’n vakjury eur opwachting make in ’n ongetwiefeld oetverkoch Raodhoes.
Onder ’t motto “Weej viere ’t laeve!” is dit un kans um dien talent te laote hure of zeen, want Vastelaovend det ziet geej!
Inschrieve veur de veurselektie kin wies zondaag 28 juli 2024 via mail naor liedjes@wortelepin.nl of door aanmelding op ózze website.
Belangrieke data:
Donderdaag 5 september 2024: rippetissie Raodhoes
Maondaag 9 september 2024: veurselektie Raodhoes
Zaoterdaag 5 oktober 2024: Liedjesaovend Raodhoes