💚💛 Ik bin eine Wortelepin 💚💛
Vastelaovend organiseers se neet allein.
Achter de scherme wuurt ’t ganse jaor door vreejwilligers keihard gewerk, gesjouwd geregeld, gelache en gebouwd aan ós moeëje fieës. 💪💚💛
En umdet weej hiel gruuets zien op ós vreejwilligers, zette weej ze deze zomer in ’t zunke! 🌞
Dees waek stelle weej óg veur aan: Diana Geeraets
Lid van welke kemissie?
Ik bin Lid van o.a De Swaree kemissie, vaerder bin ik ouk nog lid van de P&M kemissie en bin ik de vertrouwenscontac persoeën binne de Wortelepin.
Wievuuel jaor actief binne de vereiniging?
Ik bin inmiddels al 25 jaor actief lid van dees moeëje vereiniging
Wat duis se precies in de kemissie?
Binne de Swaree kemissie dink ik o.a. mei euver welke artieste weej gaon boeke en wie weej de zaal aan gaon kleie ( achterwand buun, balustrade, plante enz) , ’t oetzeuke van de bands en artieste is bes lastig want de wets ouk des se ’t neet idderein nao de zin kins make, smake verschille noow einmaol,
Ik zit in de Swaree kemissie vanoet de P&M kemissie en wat in de Swaree kem. wuurt beslis en bespraoke koppel ik truuk aan de P&M zeker wat betref de aankondiginge op de sociale media en de posters die evt. gedrök mótte waere, dit zien nl zake die de P&M kem. Verzörg, ik zörg d’r vaerder ouk veur det alles wat op de socials en/of posters steit in good ” Bliëricks” dialec geschreve wuurt.
Wat is dien moeëjste Vastelaovesmoment?
Mien moeëjste Vastelaoves moment is as op ’t Swaree veur d’n ierste kier ’t groeët gezelschap binne kump ónder de klanke van De Wortel en de Pin, dan geit ’t spelke beginne, det is de start van 3 waeke
same met alle andere kemissies d’r veur zörge det Bliërick ‘ne fantastische Vastelaovend krieg..
Waovan kins dich genete?
Ik vind kieke nao d’n optoch heerlik dao geneet ik van.
As ik zeen wie ós Trio en ós Jeugduo genete van alles wat ze in dees 3 waeke meimake det is zoeë moeëj um te zeen, ouk de verhaole van ’t Jeugduo die ik idder jaor meug controlere veur in de Wortelegaejer dao geneet ik van.
Waorum duis se vreejwilligerswerk? En waorum beej de Wortelepin?
Ik bin beej de Wortelepin gegaon umdet ik ‘ne Vastelaovesvierder en ‘ne echte Wortelepin bin, en naodet mien schoeënvader in 1998 in ’t Trio haet gezaete ik de vereiniging van d’n andere kant heb liere kinne en nog mier waardering heb gekrege veur de minse die dit alles oranisere, want ’t geit ech neet vanzelf, same zörge weej d’r veur det dit moeëje fieës nog lang in Bliërick gevierd kin waere, dinks dich noow ” heej ” det liek mich ouk waal wat sloet dich dan beej ós aan en doot mei want:
Ós Bliërick det zal noeëits vergaon zoeëlang de Wortel en de Pin bestaon.
