💚💛 Ik bin eine Wortelepin 💚💛
Vastelaovend organiseers se neet allein.
Achter de scherme wuurt ’t ganse jaor door vreejwilligers keihard gewerk, gesjouwd geregeld, gelache en gebouwd aan ós moeëje fieës. 💪💚💛
En umdet weej hiel gruuets zien op ós vreejwilligers, zette weej ze deze zomer in ’t zunke! 🌞
Dees waek stelle weej óg veur aan: Enrico Tacken
Lid van welke kemissie?
Bestuurslid – Penningmeister
Wievuuel jaor actief binne de vereiniging?
11 jaor lid van de Wortelepin: 9 jaor als lid van de Raod van Elf en 2 jaor as penningmeister.
Wat duis se precies in de kemissie?
As penningmeister probeer ik inzich te gaeve van ‘t financiele reile en zeile van ós vereiniging. Naeve ‘t regele van alle in- en oetgaonde betalinge, zörge veur ‘n gezónd hoeshaldbukske.
Dit doon ik vanaaf dit jaor same met Marc Stoffels, dae de rol van 2e penningmeister haet euvergenaome van Roel Leenen.
Wat is dien moeëjste Vastelaovesmoment?
As kersvers lid van de RvE ‘t intern veurstelle van ‘miene’ ierste Prins Jeroen Gerats. ‘t Intern veurstelle is altied ‘ne zier biezóndere aovend. As se det d’n ierste kier mei maks met zónne grandioze Hoeëgheid… ónvergaetelik.
Waovan kins dich genete?
‘t Óntvange van de femilie van ‘t Trio op ‘t Swaree. Veur ‘t oetrope, wuurt de femilie en goje vrinde van ‘t Trio via ‘ne geheime ingang binnegelaote in ‘t Raodhoes. D’n aanblik van eur gespanne gezichte is ónbetaalbaar.
Waorum duis se vreejwilligerswerk? En waorum beej de Wortelepin?
Nao ruum 40 jaor lidmaatschap van de Bliërickse handbalvereiniging, vroog Paul Lenders mich um beej de RvE te kómme. Aangezeen de Wortelepin ‘n begrip is in Bliërick en steit veur gezelligheid en plezeer, waas de keuze vlot gemak.
