Noow de nieje liedjes van kommend jaor weer bekind zien, kinne weej aaftelle nao de äöpening van ein niej vastelaovesseizoen. Beej dae start op d’n Elfde van d’n Elfde wuurt neet allein ’t nieje vastelaovesseizoen op gang geschaote, maar is auk de nieje Opstaeker verkiegbaar. Ein sieraod, det inmiddels onmisbaar is veur idderein in de gemeinte Venlo dae de vastelaovend ein werm hert toedruuëg. Dit jaor is gekaoze veur de kreatieve doézendpoët en wagebouwer in Belfeld woenachtige Joeri Holtman.
Al zien ganse laeve steit veur Joeri ’t same viere van vastelaovend centraal. Joeri: “Veur vuuël minse begint de vastelaovend op d’n Elfde van d’n Elfde. Det geveul van same beejeinkômme en oétkiéke nao de kômmende maonde van plezeer en traditie heb ik verwerk in d’n Opstaeker”.
Veur ’t ôntwerp van D’n Opstaeker woel Joeri veural ein herkinbaar vastelaovesgeveul truuk te laote kômme. Idder jaor wuurt de vastelaovend mit alleman aafgetrap op Elf van Elf, waobeej ’t kenôn ein belangriéke rol speult. Um D’n Opstaeker ein extra feestelijk tintje te gaeve haet Joeri ein speulse prinsemuts op ’t kenôn geplaats. Op ’t raad haet hae subtiel d’n teks ‘Same viere weej de vastelaovend’ verwerk, verwiézend nao waat Joeri zelf erg belangriék vindt: ’t same kômme, same viere en geneete van de traditie.
D’n Opstaeker 2027 is vanaaf d’n Elfde van d’n Elfde verkriegbaar via de website en leeje van de Wortelepin
