’t Bestuur van Vastelaovesgezelschap De Wortelepin haet beslaote um d’n Hier Ben Rayer veur zien verdeenste veur de Bliërickse gemeinschap te ónderscheide en te beneume tot Groeëtmeister in de orde van ’t Bliëricks Hert.
As aktief lid van De Wortelepin haet Ben Rayer zich jaorelang met vuuel ore vreejwilligerswerk ingezatte veur de Vastelaovend in Bliërick.
As echte vereinigingsman noom hae beej de Wortelepin in zien 40 jaor lidmaatschap verschillende take op zien schouwers.
Ónder andere de technische kemissie de Raod van Elf en ’t bestuur hebbe meuge profitere van zienen inzet um mede ’t gezich van de Wortelepin te bepaole.
’n Aparte vermelding verdeend netuurlik zien 14 jäörig Ceremoniemeisterschap, waarschienlik de zwaorste taak binne de vereiniging, die ’n top prestatie kin waere geneump.
Det hae in 2023 woort oetgerope as Prins Ben 1 waas dan ouk mier as verdeend.
Ben Rayer waas en is multi inzetbaar as organisator, beleidsmaker doener en dinker. Stónd en steit altied klaor um zien steintje beej te drage as det nuuedig is.
Echter neet allein de Wortelepin haet kinne profitere van de talente van Ben Rayer.
Deze vreejwilliger haet ouk ’n staat van verdeenste beej voetbalclub SVB, wao met name de jeugaafdeiling haet geprofiteerd van deze kertrekker.
‘ne Veurbeeldige vreejwilliger zónder die vereiniginge neet kinne bestaon en die jaomer genóg taegeswaordig neet mier veur ’t oprape ligge.
Weitende neet volledig te zien gewaes concludere weej det Ben Rayer zoeëwaal op sportief as op cultureel gebied ziene titel Groeëtmeister in de orde van ’t Bliëricks Hert veur de Bliërickse gemeinschap diek en döbbel haet verdeend.
Ós felicitaties gaon oet nao Ben Rayer as Vors Carotius de IX um op zaoterdaag 7 fibberwari 2026, tiedes de huldiging van de Jubilarisse, de diek verdeende orde en de beejbehurende oorkonde oetreik.
