De Bliërickse liedjes gaon al truuk wies de jaore vieftig van de veurige ieëw. Ónlosmakelik zien de liedjes verbónde met de Bliërickse Vastelaovend. Sterker nog de Liedjes behure tot ‘t Bliëricks cultureel erfgood.
Um dit erfgood te behalde en ouk weer jaorliks aan te völle met nieje parelstökke is ‘t projek Liedjesaovend in ‘t laeve gerope. ‘n Samewerking van de Wortelepin met vreejwilligers met as doel d’r veur te zörge det ózze Liedjesaovend meibewaeg met d’n tied.
Aan de veurkant is vanaaf december veurig jaor al gestart met de evaluatie en ‘t herijke van de Liedjesaovend. As vereiniging hebbe weej de stap dörve te neme um veur ‘t iers sinds jaore weer met ‘n liveband aan de slaag te gaon. Met Big Band Beats&Boogies hebbe weej d’n ideale partner gevónde.
Vaerder is dit jaor de livestream geprofessionaliseerd zoeëdet degene die gen kaart hebbe kinne kriege vanoet thoes mei kinne genete. Weej dinke det dit jaor ‘t fundament is gelag veur de toekómstige jaore. En jao, druime doon weej nog altied.
Wie sjiek zoel ‘t zien um in de toekóms de Liedjesaovend weer live oet te zende op tillevisie? Veur vanaovend gaon weej same met óg genete van de Liedjesaovend 2.0. Dank aan alle betrokkene die meigewerk hebbe um dit projek meugelik te make!
Bestuur
Vastelaovesgezelschap “de Wortelepin”
Zaal aope: 19:15, start program: 20:00 – Plaatse zien vreej beschikbaar, gen gereserveerde plaatse!
En heb geej noow al zin in ein drenkske? Zörg det geej van teveure óg munte haolt beej ’t Raodhoes, dan hoof ge zaoterdaag neet in de rie te staon. De groeëte vraog zaoterdaag blief netuurlik: Wae geit d’r met De Giel nao hoes?
Veur de thoesblievers is d’r ‘ne professionele livestream te volge. Klik heej veur d’n livestream.
Klik heej um de finaliste te bekieke.
Klik heej um ’t Liedjesbukske 2026 te downloade.
De Energa Liedjesaovend 2026 is volledig OETVERKOCH.
