💚💛 Ik bin eine Wortelepin 💚💛
Vastelaovend organiseers se neet allein.
Achter de scherme wuurt ’t ganse jaor door vreejwilligers keihard gewerk, gesjouwd geregeld, gelache en gebouwd aan ós moeëje fieës. 💪💚💛
En umdet weej hiel gruuets zien op ós vreejwilligers, zette weej ze deze zomer in ’t zunke! 🌞
Dees waek stelle weej óg veur aan: Susan Verstegen
Lid van welke kemissie?
Ik bin lid van de Technische Kemissie
Wievuuel jaor actief binne de vereiniging?
Vanaaf 2019 bin ik lid van de Wortelepin
Wat duis se precies in de kemissie?
Iddere jaor zörge weej d’r veur det Worteletruuj weer klaor is veur de Vastelaovesdaag, taeves zörge weej d’r veur det de groeëte en jeug wage spik en span zien veur de groeëten optoch op Vastelaoveszóndaag.
Van te veure zien weej veural bezig met de opbouw en zaalversiering van de evenemente.
Wat is dien moeëjste Vastelaovesmoment?
Det zien d’r mierdere, maar dan gaon ik toch veur de momente det ik ouk met Pap en Mam Vastelaovend vier, det is zoeëwaal beej de Worteleschrabbers as beej de Wortelepin.
Vastelaovend is mich met de paplaepel ingegaeve in d’n Bookend en Bliërick.
Vastelaovend viers se same, met vrinde, maar ouk zeker nog gezellig met Pap en Mam (schaelt mich dök ouk bónne 😉).
Same ’n pilske drinke met Pap slaon ik dan ouk neet euver, met andere trouwes ouk neet.
Waovan kins dich genete?
’t Is misschien hiel teagestriejig maar ‘t moment det op dinsdaagaovend straks is ‘t weer aswoensdaag wuurt ingezatte en Worteletruuj verbörd wuurt vind ik ein van de momente wao ik metein van geneet. ’t Moment des se ouk weer dinks aan alle moeëje momente van de aafgeloupe periode en stiekem alweer nieje planne bedinks veur ‘t volgende Vastelaovesseizoen.
Waorum duis se vreejwilligerswerk? En waorum beej de Wortelepin?
Ik bin gebaore en getaoge in Bliërick en heb mede in Bliërick Vastelaovend liere kinne/viere. De wortelepin is zó’n moeëje vereiniging det ik dao gaer aan woel beejdrage, en det is gelök binne de technische kemissie. Naeve det weej vuuel bezig zien met de Vastelaovend is ‘t ouk ‘n gezellig same zien met idderein dae zich inzet veur ózze schoeëne Vastelaovend in Bliërick.