💚💛 Ik bin eine Wortelepin 💚💛
Vastelaovend organiseers se neet allein.
Achter de scherme wuurt ’t ganse jaor door vreejwilligers keihard gewerk, gesjouwd geregeld, gelache en gebouwd aan ós moeëje fieës. 💪💚💛
En umdet weej hiel gruuets zien op ós vreejwilligers, zette weej ze deze zomer in ’t zunke! 🌞
Dees waek stelle weej óg veur aan: Milou Ooms
Lid van welke kemissie?
Ik bin lid van de jeugkemissie.
Wievuuel jaor actief binne de vereiniging?
Ik bin al 3 jaor lid van de jeugkemissie. Heejveur bin ik dansmerietje
gewaes beej de jeug en ‘t groeëte gezelschap.
Wat duis se precies in de kemissie?
Binne de jeugkemissie hald ik mich veural bezig met de dansmerietjes en met
de instagram en met ‘t tiktok account van ‘t jeuggezelschap.
Wat is dien moeëjste Vastelaovesmoment?
Mien moeëjste Vastelaovesmoment is as ik zeen det de kinder genete van alle
moeëje momente die d’r veur eur zien geregeld. De lach op eur gezicht is
iddere kier weer leuk um te zeen as ze op ‘t podium staon of zelfs as ze aan
de ziekant staon en ‘t same nao eure zin hebben. ‘t Is geweldig um te zeen
wie ein gruupke ónbekinde kinder oetintelik op kin bleuje tot vrindschap.
Waovan kins dich genete?
Ik geneet d’r van um samen met de kinder mei te loupe in de prachtigen
optoch en van de sfeer dae Vastelaovend met zich mei bringk. ‘t Is leuk um
te zeen wie idderein elkaars vrind is. Ik kin ouk genete van ‘n lekker
glaeske pils te drinken same met mien vrinde tiedens Vastelaovend.
Waorum duis se vreejwilligerswerk? En waorum beej de Wortelepin?
Sinds ik ein klein maedje waas woel ik niks lever as dansmerietje zien.
Oetintelik moch ik beej ‘t jeuggezelschap deilnemen as dansmerietje veur
verschillende jaore en bin ik doorgestruimd nao ‘t groeët gezelschap as
dansmerietje. Toen kwaam corona en had ik beslaote um te stoppen as
dansmerietje. Allein miste ik iets en woel ik gaer iets beteikenen veur de
Wortelepin. Ik vind ‘t erg leuk um met kinder te werken, dus waas de
jeugkemissie ‘n geweldige kans um beej te gaon. Ik doon dit al 3 jaor met
alle leefde en plezeer en ik doon ‘t netuurlik veur de glimlachen op de
kinder eur gezicht.
‘t Is prachtig um te zeen wie vuuel minse eur eigen stökske beejdragen aan
de Wortelepin en det mak de Wortelepin zó’n werme en leuke vereiniging um
beej te zitte.