De hoeëge Bliërickse Vastelaovesónderscheiding ‘de Worteletruuj’ wuurt in 2023 toegekind aan Jeugbewaeging St. Hubertus Bliërick. Det haet de jury van de Worteletruuj beslaote.
‘De Worteletruuj’ wuurt idder jaor toegekind aan persoeëne, vereiniginge of instellinge die zich verdeenstelik hebbe gemak op lokaal/regionaal gebied. De oetreiking is óntstaon op initiatief van ’t veurmalig Fonds Sociale Aktiviteite en wuurt hede ten dage veurtgezatte door Vastelaovesgezelschap ‘de Wortelepin’.
Jeugdbeweging St. Hubertus, in Bliërick baeter bekind as de JHB, is al haos zeve decennia neet weg te dinke oet de Bliërickse gemeinschap. Sinds 1954 vinde Bliërickse blage en jeugdige van alle range en stande de waeg nao ’t alde parochiehoes van de Hubertusparochie aan de Stalpaert van de Wielestraot. Dao zörge de talloze vreejwilligers van JHB sinds jaor en daag veur ‘n sportieve en sociale vrejetiedsbesteding.
Vaste hoeëgtepunte op de jaorlikse kalender vorme ’t jeugkamp, de kinderdisco’s maar netuurlik ouk ’t viere van de Vastelaovend in ’t eige Hazeriek. Neet gek netuurlik as ge bedink det in de beginjaore van de vereiniging de JHB standaard de Bliërickse Jeugprins leverde. Anno 2023 is de ‘groeëte’ Wortelepin prins nog altied te gas op de resepsie van de Jeugprins dan waal Prinses van ‘t Hazeriek. Minnig ald-Prins van de Wortelepin waas vruger zelf lid van de JHB of op latere laeftied actief as vreejwilliger beej de vereiniging.
Al vanaaf de oprichting in 1954 is ‘t doel van de JHB um de jeug kinnis te laote make met laeftiedsgenoeëte oet alle deile en wieke van Bliërick. Samewerking door middel van sport, spel en creativiteit steit beej alle activiteite veurop. ‘n Golde formule waomei de vereiniging door de jaore haer al tig generasies Bliërickse blage aan zich haet weite te binde. Vastelaovesgezelschap de Wortelepin is dan ouk verierd de Worteletruuj in 2023 toe te kinne aan Jeugbewaeging Sint Hubertus.
De ónderscheiding wuurt oetgereik tiedes ‘t 47e Groeët Gala Worteletruuj op dinsdaag 14 fibberwarie. De opbrings van ’t Gala geit nao ’n good doel, det in euverleg met de laureaat wuurt bepaold en op ‘t Gala bekind zal waere .