Prins Arthur I

 

Prins Arthur I

Arthur de Ruiter, 51 jaor jónk en sinds 1993 getrouwd met Marion van Oijen en gruuetse pap van dochter Laura van 22 lentes jónk en zoon Martijn van 18 jaor.

Laevesloup

Arthur de Ruiter, 51 jaor jónk en sinds 1993 getrouwd met Marion van Oijen en gruuetse pap van dochter Laura van 22 lentes jónk en zoon Martijn van 18 jaor. Nao 3 jaor te hebbe samegewoeënd in ‘t Greunveld in Venlo snel weer truuk gegaon nao de goje kant van de Maas. Al bijna 25 jaor woeëne we noow met vuuel plezeer op de Poerkerplak in Hout-Bliërick. Maar uiteraard zuus se ós nog vuuel in ‘t Bliërickse!

Opgegreujt in ’t Bliërickse Annakamp in de schaduw van de Knoepert. Heej ouk op ‘t Twiespan nao de liegere schoeël gegaon. Dao al vuuel vrinde opgedaon, wao ik wies op d’n daag van vandaag nog ‘ne hechte band mei heb. In ózze vreje tied heelde we ós bezig met schoeëlvoetbal en met judo in de zaal in de Frederik Hendrikstraot. In 1980 op de fiets nao ‘t Blaricacumcollege um aan de opleiding Havo te gaon beginne. Nao 6 jaor ‘t felbegeerde diploma gehaold. En inderdaad 6 jaor in plaats van 5 jaor, vanwaege de gezelligheid. Tiedens deze periode ouk begós aan mien beejbaantje beej de WPK van ald Prins Toën Verhalle ( Prins in 1989 ). Nog altied zier dankbaar um met en veur deze geweldige man gewerk te hebbe. Nao de Havo begónne op de MEAO in Venlo in de commerciële richting.
Twieë jaor later helaas geflats, umdet ‘ne lieraar mich ‘t diploma neet ech gunde, vanwaege ‘t feit det ik neet ech mien bes had gedaon en andere prioriteite had boete ‘t blokke.

Veur ‘t examen had Toën mich echter al ‘n baan aangebaoje beej de WPK. Mien MEAO diploma heb ik toen in de aovendore gehaold. Ik had ‘t waal gehad met schoeël. Nao dreej jaor met vuuel plezeer dao gewerk te hebbe, de stoute schoon aangetrokke en aan ‘n nieje oetdaging begós beej Toplease in Venlo. Ouk heej weer dreej geweldige jaore gewerk. Nao wat andere baantjes bin ik in 1995 begós beej AMI in Lomm. Heej binnegekómme as verkouper binnedeens en mich oetintelik kinne en meuge óntwikkele tot opperbevelhebber van dit prachtige bedrief. Ouk Arwin van den Aarssen bin ik zier dankbaar veur de kanse die ik heb gekrege.

Uiteraard heb ik vuuel cursusse en traininge, met positief resultaat, gevolg tiedens de bijna 25 jaor det ik veur AMI meug werke. Mót waal bekinne det ‘t mei met blood, zweit en traone ging. Maar achteraaf gen seconde spiet heej van. Kiek d’r al nao oet um in 2020 mien 25 jäörig jubileum te viere.

In miene vreje tied meug ik gaer vertoeve op ‘t graas um ‘n klein belke te houwe. Dit doon ik actief beej GSV op Golfbaan de Berckt in Baolder. En uiteraard ouk met andere gezellige minse op verschillende bane wao ‘t good toeve is. Um aan mien conditie te werke, tref se mich twieë kier per waek aan beej My35’ in Bliërick. Ouk gaon ik regelmaotig met Martijn nao de moeëjste club van Nederland in ós houfstad Amsterdam. ‘t Blief elke kier prachtig um de sfeer beej Ajax in de Johan Cruijff Arena te meuge preuve.

As lid van de Hout-Bliërickse Ondernemersclub HOBOC en de Echoputters van fanfare de Echo treffe weej mekaar ‘n gas kier per jaor um van elkaar te liere en gezellige activiteite te óntploeëje. En uiteraard zien we Golde Gaever van Vastelaovesgezelschap ‘de Wortelepin’. Dit is ‘n moeëje club met ‘n good gezelschap van sponsors die de Vastelaovend en de Pin ‘n werm hert toedrage!

In ‘t Vastelaovesverleje vuuel optochte meigeloupe met joekskapel Labberjoeks en later met de Plekbókse. Vuuel Swarees meigemak en al sinds de ierste Hierezitting, destieds in de Staay, met ‘ne hechte vrindegroep aan taofel. En dit jaor neet in de zaal, maar op de buhne as Hoeëgheid 2020 met twieë fantastische Adjudante.

Vastelaovend Same!

Adjudant Fons

 

Adjudant Fons

Alhoewel de meiste Wortelepinkes en Wortelepinne mich nog zulle kinne as ald Raod van Elf lid, wil ik gaer ‘t ein en ander euver mien ‘roots’ vertelle. 

Laevesloup

Ik bin as jongste telg 55+1 jaor geleje gebaore op de Emmastraot in Venlo-Zuid. Mien mam (Els) waas ‘n ech Bliëricks maedje van Goertz-Soree oet de 1e Graaf van Loeënstraot en mien vader waas Sjaak Houben, oet de Van Bornestraot. Mien groeëte broor André is midde op de Antoniuslaan gebaore. Hay, de middelste van de ‘dreej broors’ is in Tilburg gebaore en helaas vuuels te jónk op 15-jäörige laeftied as Ziejverkenner gestorve.

Vanaaf 1989 bin ik al woeënachtig aan deze kant van de Maas. Iers in Bliërick en noow, same met mien vruike Nathalie en ós dochters Anouk (21) en Lisa (18) in ‘t moeëje pittoreske dörpke Hout-Bliërick. Sanne, ós aldste dochter, is erg kreatief en zelfstandig: zeej woeënt en studeert in Mestreech. Mienen trouwe Golden Retriever Morris is naeve mich, de enige ‘man’ in hoes. Euverigens geit ‘t thoes smeis euver paerdrieje; dao zien de jongste maedjes (en eur mam ouk) hielemaol gek van.

De Vastelaovend is mich met de paplaepel ingegaeve. Ik woort al hiel vruueg as jónk Wienbölke door mien elders meigenaome nao Janssen-van Hoesik (noow Grand Kefee Maagdenberg) en op de bar gezat. Dan kós ik good zeen wat mien vader Sjaak as ierste Vors Wienius en de Raod van Elf deje. Wie ik wat alder waas en nao de jeugvastelaovend in ‘t gemeinsschapshoes ging, zónge wee ‘as ik dich zeen’ (geschreve door ome Hand Goertz) ik bäökte mich idder jaor de ouge oet as ‘t jeugbal nao 3 aovende weer veurbeej waas.

Op Collegium Marianum heb ik mien Atheneum (B) diploma gehaold en bin ik nao de stad van de Kruikezeikers gegaon um opgeleid te waere toet lieraar Lichamelikke Opvoeding: det waas ‘ne moeëje tied met hiel vuuel lesgaeve aan kinder, sporte, vrindschappe en ouk al lol en plezeer. Ik heb dees 4 jäörige HBO-opleiding in 5 jaor gehaold, umdat miene pap helaas tiedens ‘t twiede jaor vuuels te jónk is gestorve. ‘ne Lach en ‘n traon is ouk veur ós oet ‘t laeve gegrepe.

Ik kós al van jongs aaf aan neet stil zitte en meus dus altied vuuel energie kwiet, daorum bin ik al vruueg gaon voetballe beej VVV03 en VVV. Mien vader waas der altied beej as isupporter. Ik koester nog moeëje herinneringe aan toen met as hoeëgtepunte wedstrijde met ’t Limburgs Efltal in München taege ‘t Oeësterrieks Elftal (<18) en de jeug van Bayern München. Naeve voetballe ren ik gaer; ik heb 11 halve marathons geloupe (netuurlik ouk de Venloop 6 kier, maar sneller 1.43.15 kwaam ik neet.

Ik heb met vuuel plezeer leiding gegaeve aan ein diversiteit van teams (o.a. regiomanager beej Tante Bet in Venlo) en heb vuuel ervaringe meuge opdoon met teamcoach en verandermanagement beej Thaeles. Mien passie leet dan ouk beej teamóntwikkeling, driefvaere-ónderzeuk en leiderschap. ‘t Blood kruup wao ‘t neet gaon kan: vanaaf kómmend jaor (ik schrief dit stök maondaag de 11e van de 11e) gaon ik de starte as zelfstandig óndernemer met FonsVerbindt.

Eind 1999 bin door (Ald Prins) Gé Decker en (Ald Prins) Michel Jeurissen gevraog um beej de Raod van Elf te kómme. Wat ‘ne schitterende tied waas det, wao ik gaer aan truuk dink.
As vrindeklup ‘‘t Mot Neet Gekker Waere’ zörge weej neet allein veur eige lol en plezeer, maar organisere weej in 2020 veur ‘t 7e jaor de zitting in de Ruysdonck. Beej alles wat weej daon, dinke weej altied ff truuk aan ózze kammeraod Peter Kleuskens, dae ós noow vanoet de hemel volg!

Nog ‘ne kier:

Weej genete van idderen daag met Vastelaovend: met ‘ne lach en ‘n traon, want zoeë is ’t laeve!

Adjudant Willem

 

Adjudant Willem

Ik kwaam, met de roopnaam Wilmgard, op de waereld in Elst. ‘n Toendertied klein dörpke ingeklemp tösse Arnhem en Nijmegen.

Laevesloup

‘t Dörp Elst is, óndanks mien vertrek, inmiddels oetgegreujd tot ‘n groeët dörp en ouk Arnhem en Nijmegen hebbe zich in de loup der tied vaerder óntwikkeld.

Miene liegere schoeëltied heb ik genaote op de jóngesschoeël Sint Werenfridus. Wat die jóngesschoeël bezónder makde, waas de aanwezigheid van net zoeë vuuel jónges as maedjes. Umdet Elst gen passend middelbaar ónderwies binne de gemeintegrens kós, meus daoveur waere oetgeweke nao ein van beide buurtstaej. Veur mich woort det Arnhem. Tiedes mien middelbare schoeëltied rakde ik in de ban van windsurfe en waal zoeëdanig det det – same met ‘n onvoldoende besef van het belang van good ónderwies – mien middelbare schoeëltied met 2 jaor haet verlingk.

Nao de middelbare schoeël volgde beej mich de deenstied. ‘ne Tied waorin ze ‘ne echte man van mich hebbe probere te make. De deenstied woort gevolg door mien studietied. In zoeëwaal Nijmegen as Leiden heb ik 2 universitaire titels behaold. Mien kinder zegge op momente det ze mich minder serieus neme noow nog altied “Papa is meister – meister”.

Mien werkzame laeve leidde mich van kandidaat-notaris nao medewerker van verschillende groeëte banke en oetintelik nao advekaot. Geografisch bin ik in ‘n hiel oetgestrek gebied werkzaam gewaes, waobeej ik in mien huidig beroep van advekaot veur ‘t iers van mien leave, woeëne en werke in dezelfde stad kin kombinere.

Tiedes mien werk beej ‘n bank in Venlo, lierde ik Ingrid en dochter Kim kinne. Weej ginge met ós dreje in ‘n op 3 persoeëne ingerich hoes in ‘t centrum van Bliërick woeëne. Vanaaf det moment luuster ik nao miene Limburgse naam Willem. Wie ózze Gijs woort gebaore, meus ós hoes waere aangepas en met de geboorte van ózze Pip meus ‘t hoes nog ‘ne kier waere aangepas. Wie zoëë, “regere is veuroetzeen?”

Op sportief gebied kin ik gen beperkinge – voetbal, handbal, hockey, waterpolo, skieën, judo – ik heb ‘t allemaol gedaon. Die beperkinge kwame euveriges later waal. Neet allein vanwaege ‘t lief det op ‘n bepaold moment neet mier wilt oetvoere wat de kop bedink, maar ouk vanwaege ‘t feit det ‘ne daag slechs 24 oor haet.

Zoeë bemeuj ik mich gaer taege dinger aan en bin zoeë ónder mier verbónde met de lokale politiek, halt mich bezig met de sponsoring van de Bliërickse hockeyklup, dink mei euver ‘n toekómsbestendige voetbalklup en bemeuj mich op bestuurlik nivo met ‘t Bliëricks gemeinschapshoes ‘t Raodhoes. Dao naeve vind ik ouk ‘t supportere van de kids beej eur sportbeoefening hiel belangriek. Sportief actief bin ik, los van ‘n incidenteel squash wedstrijdje, allein nog op ‘t golfveld. Daobeej bin ik, via ‘n jaorelang ballotage traject, oetintelik toegelaote tot de Golf Sociëteit Venlo.

Vastelaovend vierde ik in mien jónge jaore met ‘ne boerekiel, loupend in de polonaise, terwiel ‘t bekinde paerd van André van Duin in de gank stónd. Onderdeil van mien inburgering in Bliërick, waas ‘t kinnisneme van de Bliërickse Vastelaovestradities. Heejbeej staon veur mich met name ‘t Swaree – de volwasse manne met de parapluutjes – en de Hierezitting al ‘n jaor lang met watervaste viltstift in miene agenda genoteerd.

Golde Gaevers

Ós Golde Gaevers make ’t meugelik det weej al ós aktiviteite en evenemente kinne organisere. Ózze dank geit oët naor de bedriëve die geej op deze pagina kint bekieke.