‘D’n Opstaekerᵀᵐ 2022’

 ‘n ontwerp van Sabrina van Wijlick

We hebbe d’r nog langer op mótte wachte as we gewind zien, maar ’t liek d’r op det Vastelaovend 2022 weer geit lieke op de Vastelaovend wie we dae gewind ware. Beeldend kunstenaer Sabrina van Wijlick oet Belvend haet in idder geval veur de kómmende Vastelaovend ‘D’n Opstaekerᵀᵐ 2022’ óntworpe en det vindt het ‘n hiele groeëte ier. ‘Ik vónd ‘t hiel erg kwant wie Ron van Zoest, veurzitter van de Belhamels, mich vroog of ik ‘d’n Opstaeker 2022 woel óntwerpe en dao bin ik hiel gruuets op’.

Sabrina van Wijlick makde dees broche oet naam van alle vief de stadsdeilvereiniginge van de gemeinte Venlo. ’Hiel vuuel minse in ós regio hebbe hert veur Vastelaovend, det veulse. Zeker noow ‘t fees in 2021 anders waas as veurgaonde jaore’.  

“Det ‘halde van’ heb ik probere oet te drökke in deze niejen ‘Opstaeker’. ’t Is ‘n aope hert met dao umhaer ‘n zaag, symbool veur de (wage)bouwers, ‘n piensel veur de grimeurs, de ‘träőt’ en de sol-sleutel veur de muzikante en netuurlik de vlag die met de dolle daag oet meug’. ‘t Aope hert luuet de kleur van ‘t ‘pekske’ van d’n drager zeen. Dit óntwerp, van in totaal dreej schetse, is oetintelik door de Vorste van de vief stadsdeilvereiniginge gekaoze.

Sabrina van Wijlick viert al zien ganse laeve Vastelaovend. Ik vier det veural mit ós vrinde. Idder jaar bouwe we ouk ‘ne wage en trekke we mei met de Belvendse Optoch. ‘Ózze naam? ’t Jeuk wir’. Maar ouk boete ‘t seizoen is ut creatief bezig. ‘Ik bin Chef Decor beej de musical van ‘t Valuascollege in Venlo.

 ‘D’n Opstaekerᵀᵐ’ is ‘n saort broche die steit veur ‘n dreejtal zake; ‘ne bliek van waardering veur de talloze vreejwilligers die allerlei vVstelaovesactiviteite organisere in de stadsdeile Venlo, Bliërick, Tegele, Belvend en Aarce en Velden; ‘ne bliek van betrokkeheid mit de Vastelaovend en ‘ne financiële opstaeker veur alle Vastelaovesvereiniginge oet dees regio. De vief stadsdeilvereiniginge van de gemeinte Venlo haope det de inwoeëners, juus noow massaal de Vastelaovesbroche zulle koupe um zoeë de verschillende vereiniginge te óndersteune.

Sabrina van Wijlick (1978) is getrouwd met Roy en haet ‘n döchterke van dreej. In zien dagelikse doon werk ‘t as docent Kunst en Cultuur op ‘t Valuascollege in Venlo. Daonaevebeej is het thoes veural bezig met keramiek, ‘n passie die het met de paplaepel kreeg ingegaote. Zien vader, Herman Crins, waas namelik pottebekker en is nao zien carriere achter de pottebekkersschief keramiekcursusse gaon gaeve, iets wat zien dochter óndertösse haet euvergenaome. ‘Daobeej werke mien vader en ik vuuel same aan opdrachte die we kriege, maar ik maak ouk veel werk zelf, wat ik natuurlik ouk probeer te verkoupe’. Mier informatie euver Sabrina van Wijlick is te vinde op de Facebook Site Keramiek de Pöngelhook.

D’n Opstaekerᵀᵐ 2022 zal op d’n Elfde van d’n Elfde waere geprissenteerd. Vanaaf dan is deze ouk te koup via de verschillende websites van de Vastelaovesvereiniginge, ‘n groeët aantal winkels en tiedes ós Vastelaovesactiviteite.