Kaart verkoup Jubileum Brunch 7×11 jaor

Via deze pagina kint geej óg entreebewies koupe veur ozze jubileum brunch op vastelaovesdinsdaag beej ‘t Raodhoes.

Inloup: vanaaf 10.45 oor
Start brunch: Vanaaf 11.11 oor
Lokatie: ‘t Raodhoes in Bliërick.

Kosten: Volwassene 22 euro en Jeug tot en met 12 jaor veur 11 euro.

Aanvullende informatie euver deze speciale daag de aafsloeter van ozze Bliërickse Vastelaovend:
De Vastelaovesdinsdaag in Bliërick zal in ‘t teiken gaon staon van de Worteletruuj. Op donderdaag 27 fibberwari 2025 zal de ierste laevende Truuj tiedes Truujendaag in ’t Raodhoes bekind waere gemak. De Truuj zal op Optochzondaag veur de Prinsewage oetgaon in ‘ne aope wage.
De Vastelaovesdinsdaag zal waere begónne met ’ne boerebrunch vanaaf 11.11 oor in ’t Raodhoes. Inloup beej ’t Raodhoes is vanaaf 10.45 oor. Koste veur deze oetgebreide brunch bedrage € 22 per persoeën. Kinder tot en met 12 jaor kinne veur € 11 aanschuve. Vanaaf 3 fibberwari a.s. zien kaarte veur d’n brunch te verkriege op ós website of beej Harry Peters in de winkel. Idderein is van herte welkom beej d’n brunch ouk as se daonao neet mei geis nao de stad. Dus kom gewoeën same met dien femilie gezellig brunche in ’t Raodhoes!
Nao d’n brunch waobeej ’t Jubileum Trio en de Truuj prominent aanwezig zien zulle we rónd de klok van 13.30 oor te voot nao de stad vertrekke waobeej we ’n bezeuk bringe aan de Boerebroelof  (optoch) en ’n aantal Bliërickse kefees op de Parade bezeuke. Kleierveurschrif veur dezen daag is boerebroelofskleier/ Truujekleier met beej veurkeur ’ne tint van greun/oranje. Det kin zien in de vorm van ‘ne greun/oranje sjaal  pochetje of hudje.(eige keuze)
Rond de klok van 19.00 oor zulle we dan truuk gaon nao Bliërick. Vanaaf 19.45 oor start ’t aovendprogramma met ’t inzaegene van ’t Worteletruujbeeld en de laevende Truuj op ’t Laurentiusplein. Daonao zal de stoet richting ’t plein veur de Antoniuskerk gaon veur ’t Worteletruuj verbörre. Roy van den Broek zal as ierste tenor ’t wereldberoemde “Straks is ’t weer Aswoensdaag” ten gehure bringe. Ouk zal de Truuj ‘n liedje zinge. ’t Jubileumtrio en de Truuj zulle ós beschermvrouw de Worteletruuj in brand staeke as teiken det de Vastelaovend veurbeej is. Aansloetend zal beej ’t Truuj verbörre ’t Trio, Jeugduo, Vorste, Sirremoniemeisters en Raod van Elf de mutse aafzette.
Nao ’t Truuj verbörre umstreeks 20.45 oor zulle weej de Bliërickse Vastelaovend aafsloete beej ’t Raodhoes. In ’t Raodhoes zulle nog eine kier de 4 winnende liedjes en Roy van den Broek veur óg optreje en zal ‘ne DJ nog eine kier de tent op de kop zette. ’t Trio en Jeugduo zulle óg dezen aovend veur d’n allerletste kier toespraeke.