111de CD Wortelepin oetgereik

Op vriedaagaovend 20 november woort de 111de CD van Vastelaovesgezelschap ‘de Wortelepin’ in ’t Fort Museum Venlo oetgereik door prins Arthur I aan d’n hier Maikel van Vugt.

D’n hier van Vugt, 34 jaor, is in ’t dageliks laeve werkzaam as engineer beej Reef in Eindhoven. Daonaeve beej actief as staflid beej de welpe ‘Mowgli-horde’ van Scouting St. Lambertus in Bliërick, bestuurslid/webbeheerder van Heemkundekring Blariacum en ‘last but not least’ Vastelaovesvierder in hert en zeel.

As Vastelaovesgek is d’n hier van Vugt neet ónopgemerk gebleve in ’t Wortelepinneriek. Sinds 2011 leet hae beej ‘t ‘Galdere’ en ‘Blariacum Baeregood’ meinigeen op de geveulige plaat vas en verzamelt alles wat veurnamelik met de Bliërickse Vastelaovend te make haet. Zien collectie besteit oet ónder andere medailles, meziekstökke, Vastelaoveskrante van de Wortelepin, de Poerker, de Worteleschrabbers en d’n Duikelaer. Euveriges euverschrijdt zien gezónde verzamelwoede ondertösse ouk de grenze van ’t westelik halfrond van de gemeinte Venlo.

In fibberwari woort in ’t Fort Museum Venlo door de Heemkundekring Blariacum ‘n vastelaoves expositie aangebaoje. Geëxposeerd woort ‘n deil van de inmiddels oet mier dan 2.500 stöks bestaonde verzameling van d’n hier van Vugt. Ouk dit vastelaovesseizoen sprik d’n hier van Vugt de haop oet um op dees unieke locatie, ‘t Fort Museum Venlo, weer ‘n tentoeënstelling te organisere. Vastelaovesgezelschap ‘de Wortelepin’ haet de intentie oetgespraoke um ‘n beejdraage te doon aan dees editie.

De Wortelepinne CD van 2021. Ónder ’t motto ‘Weej zien d’r klaor veur!’ woort beej Marlstone Music in Ulestraote de veer winnende liedjes van de in september gehalde Liedjesaovend opgenaome en op CD gezat. De CD is aangevöld met de veer winnende liedjes van veurig jaor. ‘n Unieke Vastelaoves CD, oetgebrach in ‘n uniek jaor. ‘n Prónkstök en te koup op de vaste verkoupadresse van Vastelaovesgezelschap ‘de Wortelepin’.

Met de oetreiking van de 111de CD aan d’n hier van Vugt iere weej, Vastelaovesgezelschap ‘de Wortelepin’, d’n hier van Vugt en spraeke weej ten ierste ós waardeering oet veur zien enthousiasme veur de Vastelaovend in ’t algemein en de Bliërickse in ’t bezónder, ten twieëde appreciëre weej det hae zien unieke verzameling exposeert én ten derde det hae meug geneete van de nieje aanwinste aan de krallentoer van Bliërickse liedjes.

D’n hier van Vugt, beste Maikel, perficiat!