Opstaeker™ 2012

D'n Opstaeker™ 2012' 'n óntwerp van Har van der Linden

De Belfeldse kunstenaer Har van der Linden haet veur de kómende vasteloavend 'd'n Opstaeker™ 2012' óntworpe. Names CV de Belhamels oët Belvend had veurzitter Bert Nabben dit jaor de ier um 'n kunstenaer veur te drage oët naam van alle viëf de stadsdeilvereiniginge. Veur van der Linden waas 't 'n groëte verrassing det de veurzitter van de Belhamels um vroog. “Ik vind 't 'n groëte ier um veur alle vastelaovesvierders in de gemeinte Venlo d’n Opstaeker te meuge ontwerpe. Daor bin ik hiel erg trots op”, zaet van der Linden. “Ik bin dezelfden aovend begos met 'n aantal ontwerpe. Daornao bin ik de schetse gaon oëtwerke. In totaal heb ik d'r viëf gemak”.

Oëtintelik hebbe Jocus, de Wortelepin, d’n Oeles, de Belhamels en de Keieschiéters unaniem gekaoze veur ein ontwerp. “Det zoel ik zelf ouk gekaoze hebbe”, zaet van der Linden trots. “'t Is 'n vrolike ‘vastelaoves-snoët’ die opgebouwd is oët de beginletters van de viëf stadsdeile van de gemeinte Venlo en symboliseert de samewerking tösse de viëf stadsdeilvereiniginge. De figuur lacht veur inkele daag alle zörg weg. Hae viert vastelaovend zowie 't huurt, met vuuël ‘joeks en jen’ um daornao de hektiek en stress van alle daag te kinne trotsere”, aldus de Belvendse schilder.

'D'n Opstaeker™ ' is 'n soort broche die steit veur 'n dreejtal zake; 'n bliek van waardering veur de vuuële vreejwilligers die allerlei vastelaovesaktiviteite organisere in Venlo, Bliërick, Tegele, Belvend, Arce en Velde; 'n bliek van betrokkeheid met de 'vastelaovend' en 'n financiële opstaeker veur alle vastelaovesvereiniginge in de regio. De vief stadsdeilvereiniginge van de gemeinte Venlo haope det de inwoeners, net wie verleje jaor, weer massaal deze vastelaovesbroche zulle koupe um daormei de vastelaovesactiviteite van de diverse vereinige te óndersteune. D'n Opstaeker™2012 is te koup vanaaf 11-11. Priësinformatie vindt geej in ózze catalogus

Opstaeker ™ 2012

Har van der Linden, van 3 maart 1943, is gebore en getoge in Belvend. Hae is altiëd hiel aktief gewaes met vastelaovend. “Netuurlik heb ik meigedaon met de Belvendse Optoch, heb ouk vastelaoveswagens geschilderd. Maar ik bin ouk sjurylid van de optoch gewaes. Ik heb zelfs 'n gas kier 'n buut gemak”. In 1984 woort van der Linden oëtgerope toet Prins Carnaval. Ouk is hae ruum tiën jaor veurzitter gewaes van de ald-prinsevereiniging. “Veur mich is vastelaovend 'n neet mier weg te dinke volksfiës waor se gezellig met idderein kins kletse en zinge”.

Van der Linden is altiëd maatschappelik betrokke gewaes. Hae is jaorelangk wethalder gewaes in de Belvendse gemeinteraod en zelfs nog 'n tiëdje locobörgemeister. De veurmalige programmeur van Océ- van der Grinten zaet noëit te hebbe gedach oëits te gaon schildere. “Det ik bin gaon schildere is puur toeval. Ik bin lid van 'n kaegelklub die regelmaotig andere aktiviteite organiseert. Op dees wiës heb ik kinnisgemak met Gerda van der Sterren (Opstaeker™ 2010 red.) waor we tiën aquarellesse krege. Ik vond 't zoë leuk det die tiën lesse veer jaor woorte. Daornao heb ik nog les gehad van Bob Tomanovic in Leiden`.

Van der Linden schildert veurnamelik symbolische werke met zoëgenaamde ´naat in naat´ aquarelleertechnieke in aolie glaceertechniek. Beej naat in naat ontsteit 'n saort ´gesteurde spontaniteit´, zoëdat 't werk 'n neet van teveure vasgestelde vorm zal kriege. Naeve symbolisch schildert van der Linden ouk abstrak, figuratief, realistisch. Werke van um hange in ónder mier in Nederland, België, Duitsland, Engeland, Rusland en Canada.

Har van der Linden is 'n echte laatbleujer dae zaet det 't schildere mier is dan 'n hobby. `Veur mich is schildere 'n obsessie, 'n obsessie waor ik mich erg good beej veul`.

Heejónder vindt geej de Opstaekers oët veurgaonde jaore: