’t Bestuur van Vastelaovesgezelschap De Wortelepin haet beslaote d’n hier Willem Gerats te beneume toet Meister in de Orde van ‘t Bliëricks Hert.

Willem is binne de Bliërickse gemeinschap ’n zier markante persuuënlikheid, dae met ziene humor en acteertalent minnig evenement haet veurzeen van de broëdnuuëdige lachmomente. Veur iddere mins is ‘n laeve zónder humor óndinkbaar en jaomer genóg zien d’r maar weinig minse die zo’n groët talent hebbe um minse te vermake en ’n aantal ónbezörgde momente te bringe. Willem Gerats is dudelik ‘nne persoën dae beschik euver ’n dergelik uniek talent. In de Groëten Optóch en op andere evenemente van de Wortelepin haet hae dök genóg bliëk gegaeve van dees talente en minse spontaan aan ’t lache gebrach. As goje komiek wet hae dök op ludieke wiëze de plaatselikke bevolking ’n speegel veur te halde en op zien eige wiëze kritische kantteikeninge te plaatse beej de lokale óntwikkelinge. Heejbeej wille weej zeker ouk verneume det weej as vereiniging in noëdgevalle altiëd ’n beroep op Willem kinne doon um dankbaar gebroëk te make van zien talente.

Det Willem ouk ‘nne echte vereinigingsman is bliëk onder miër oët zien jaorelange beeldbepaolend lidmaatschap van stamtaofel “De Waerbörstels”. Hae stónd as Praesus mei aan de basis van cultureel gezelschap “ ’t Blauw Ei ” en weej kinne op ’t ougenblik zien talente beluustere en bewóndere beej de Bliërickse Revue en de Flarusse. Eine man dae op cultureel gebied in Bliërick neet weg te dinke velt. As Hoëgheid Willem I ging hae de vastelaovend in Bliërick veur in 1993. Hae is ‘nne Kloon in hert en neere, dae neet veur niks jaorelang Opperkloon op dinsdaag beej ’t Kloonstrekke is gewaes. Zien sociaal karakter meuge bliëke oët ’t feit det hae zien beloëning meistal wegguuëf aan ’n vereiniging die hae ’n werm hert toedruuëg en zien waerbörsteligheid oët ’t feit det hae d’r slech taege kin as ’t neet löp zoë-as hae det gaer zoel wille.

Al met al genóg raeje um Willem Gerats te beneume toet Meister in de Orde van ’t Bliëricks Hert. Weej winse Willem proficiat en op de Prónkzitting op 12 november is dees Orde umgehange door Vors Carotius VI as ein van diens letste officiële handelinge.