Ónderscheidinge en ordes-VG de Wortelepin

Ónderscheidinge en ordes

Vastelaovesgezelschap 'de Wortelepin' kint verschillende ónderscheidinge en ordes.

De Worteletruuj

De ónderscheiding Worteletruuj is in 't laeve gerope door 't veurmalig Fonds Sociale Aktiviteite. Dit fonds beougde met name veur de minderbedeilde en kranke minse Vastelaovesaktiviteite meugelik te make.

Later haet Vastelaovesgezelschap 'De Wortelepin' dees doelstelling en de beejbehurende ónderscheiding geadopteerd.

De Worteletruuj woort jaorliks oëtgereik aan zoëwal 'n landelike as 'n regionale persuuënlikheid dae zich maatschappelik verdeenstelik haet gemak. Toet de landelike priëswinnaars behuuërde ónder mier ald-minister Van Doorn, mejoer Bosshardt van 't Leger des Heils, acteur/schriever Albert Mol, Leny 't Hart van 't ziëhonde-opvangcentrum in Pieterburen, actrice Anne-Wil Blankers, tv-prissentator Henk Mochèl en ald-minister Til Gardeniers-Berendsen. Regionale winnaars ware ónder mier Sjeng Deckers, Leo Brueren, Maria Hafmans, Fien Wolters, Frits Peeters en Jan van Knippenberg.

Orde van 't Bliëricks Hert

Minse die veur dees orde in aanmerking kómme waere beneump toet Meister of Groëtmeister in de Orde van 't Bliëricks Hert.

Dees orde verliënt Vastelaovesgezelschap 'de Wortelepin' aan emes dae vuuël gedaon haet veur Bliërick in ’t algemein of in ’t biezónder. Heejmei wuurt verstaon: op sociaal, maatschappelik of Vastelaovesgebied in de Bliërickse gemeinschap. Dees ónderscheiding benaodrök det de mins die dees ónderscheiding verdeent haet, zien hert veur Bliërick op de goje plek haet.

De Orde besteit oët 'n um de nek gedrage medalje, met 'n aafbeelding van 'n hert. Dees medalje is in zilver veur Meisters en in gold veur Groëtmeisters.

Prinsekruuts en Adjudanteteike

De Prins en zien Adjudante óntvange dees ónderscheiding op 't moment det zeej waere oëtgerope.

Op de zilvere medaljes zit in 't midde 't Wortelepinlogo. Vaerder is 't jaortal en de naam van d'n drager ingegraveerd.

Jubileumspeldjes

Veur leje van Vastelaovesgezelschap 'De Wortelepin' is d'r 'n jubileumspeldje. De leje wuurt die veur idder 11 jaor trouwe deens, dus 11, 22, 33, 44 of 55 jaor door Vors Carotius of door de veurzitter opgespeld.

Prinse-ónderscheiding oftewal de Hoësorde

Dit is 'n ónderscheiding van 't Hoëglöstig Trio van det jaor.

Dees medalje is jaorliks anders, iddere Prins en zien Adjudante bepaole zelf wie eur Hoësorde oëtzuuët. Meistal staon d'r aafbeeldinge van werk en hobby van de Prins en zien Adjudante op.

Leje medalje

Alle leje van Vastelaovesgezelschap 'de Wortelepin' drage ten teiken det zeej lid zien van ’t Vastelaovesgezelschap 'de Wortelepin' ’n zoëgenaamde lidmaotschapsmedalje.

De medalje besteit oët ’n um de nek gedrage medalje, met 'n aafbeelding van ’t logo van Vastelaovesgezelschap 'de Wortelepin'.

Wij gebruiken cookies om onze website te verbeteren. Cookies die worden gebruikt voor de fundamentele werking van de site zijn al ingesteld. Meer over deze cookies die we gebruiken, vindt u in onze privacy policy.
Ik accepteer cookies van deze website. Accoord