Hoëgheid Prins Jan IV-VG de Wortelepin

Hoëgheid Prins Jan IV

Jan Ningbers zoog ’t laevesleech op 1 september 1970 en is noow 41 jaor.
Hae haet ’n vriendin, Yolanda Staaks en daor is hae “stapel op” zoë wie me kin zegge. Prins Jan woënt in Bliërick

Jan is zelfstandig óndernemer, Kastelein en oëtbater van Grand Kefee Apollo

Hobby’s

Lid van de Sjenge
Lid van Blie Toe
Lid van Dart vereiniging Apollo
Visse in zeut en zalt water;
Voetbal
Kaoke, lekker aete en drinke;

Leuk um te weite:
Hoëgheid Jan haet zien culinaire inspiratie opgedaon op de LTS in Wellerlooi en hae haet vervolges zien diploma’s veur: Pattiserie, Kalde en Werme Keuke, ’t Wiencertificaat, Kefee bedriëf, Restaurant bedriëf en Liermeister behaold. Daornao is hae 11 jaor geleje begós as zelfstandig óndernemer in kefee de Witte, det hae 11 maond geleje verruild haet veur Grand Kefee Apollo.

Prins Jan vertelt: “Um de waek wuurt Grand Kefee Apollo, umgeduip in “Idders Kefee”, hetgeen inhelt, det ouk minse met beperkinge naor ós kefee kómme en zich minge met minse zonder beperkinge. Dit hebbe weej in ’t laeve gerope, um de simpele raeje, det dees minse dök in ‘n hukske gedouwd waere. Minse gaon d’r te gemekkelik vanoët det idderein maar gezónd is. As geej róndkiëk, zeet geej, det dit zeker neet vanzelfspraekend is, vandaor miene inzet veur dees minse.” Dees minse liere dan um met andere in kóntak te kómme en zelfstandig ’n consumptie te bestelle en dees ouk nog aaf te raekene. ’t Is met gen pen te beschriëve, wievuuël voldoening dit Jan guuëf wannier ’nne brei-e glimlach eure kant opgeit.

Hoegheid Jan IV

Adjudant Henny haet hae liëre kinne via SVB, waor Henny’s zoon kieper waas en Jan kieperstrainer. Idder jaor bleve zeej beejein met de nuuëdige toernoje in België sterre kiëke. Naor Italië zien ze met de bus gewaes, slaope op ‘nne airbag, pizza's aete van eine maeter beej eine maeter. Det waas ‘n waanzinnig moeij toernoeij waor eur team de 2e plaats wist te behaole.

“Sóms hesse gewoën ’t geveul asof ze mekaar al jaore kins en det waas ouk zoë in ós geval.
Adjudant Marlon heb ik liëre kinne beej Kefee de Witte, waor de seniore teams van SVB beejein kwame as zeej oëtspeulde en netuurlik van “Neet Näöle”, die beej ós vergadere, schmieke en van de gezelligheid in ós Grand Kefee genete”, aldus Jan.

Toen de minse van Neet Näöle op ‘n gegaeve moment as wagebouwers ‘n plaats zóchte um te schmienke is det beej Jan gebeurd, waornao zeej 2 kiër d’n ierste priës hebbe behaold met eure wage. Daornao zien zeej same met Jan van de Witte naor Grand Kefee Apollo gegaon.

Prins Jan IV veult zich zier verierd um same met zien Adjudante Henny en Marlon de ker in ‘t Wortelepinneriëk te meuge trekke.

Naor:

Adjudant Henny

Adjudant Marlon

Proklamatie