Miene naam is Ben Rayer, bin 5x 11 jaor jónk en sinds 29 december 2022 getrouwd met Peggy de Bock.

Same woeëne weej, met ós hundje in Baolder.

Ik bin gebaore op Kloeësterstraot 6 in ’t pand van fotograaf Jos Koopal en heb daonao 20 jaor op Kloeësterstraot 4 gewoeënd. Ik bin begós op de kleuterschoeël in de Graaf van Loeënstraot, wao ik vruueger ouk met de kinder oet de buurt gaer deej voetballe en softballe.

Ik ging vervolges naor de Titus Brandsma schoeël en daonao naor ’t Blariacumcollege.

Nao 1 jaor in Boxtel op ’t St. Lucas reclame en etalere te hebbe gezaete, woel ik gaon werke. Ik wis nog neet good waat ik later woel waere: schilder, fotograaf, verkouper meziek of sportkleiding.

Oetintelik bin ik met mien vader mei gaon schildere, maar det waas slechs van korte duur. Daonao bin ik beej de HAVAM begós as orderpicker, verkouper en inkouper. In 1999 bin ik as intercedent beej START Uitzendbureau begós en dao heb ik mich in 2003 gedetacheerd as P&O adviseur beej de Politie Limburg-Noord. Óndertösse had ik mien MBO en HBO P&O gehaold in Sittard en woel heej ouk vaerder in. Beej de Pliessie heb ik as P&O adviseur gewerk beej de korpsleiding en de recherche.

Daonao bin ik beleidsmedewerker gewaes, maar wie d’r ‘n Pliessie Nederland kwaam, waas neet bekind wao ik terech zoel kómme. Ik heb toen gesolliciteerd beej de Veiligheidsregio Limburg-Noord als P&O adviseur en bin oetintelik beej de aafdeiling Crisisbeheersing as Opleidingscoördinator en Adviseur Crisisbeheersing gaon werke. As d’r ‘n crisis is, heb ik nog ’n funktie, namelik wies 2023 as Hoofd Informatie en vanaaf 2023 as Algemein Commandant Geneeskundige Zorg.

In miene vreje tied bin ik as vreejwilliger actief beej VG de Wortelepin as Sirremoniemeister en Bestuurslid. Ik bin in 1986 begós beej de Technische Kemissie en daonao in 1998 beej de Raod van 11. Beej Voetbalclub SVB bin ik leider, trainer en lid van de aktiviteitekemissie gewaes.  Vanaaf 2011, 12 jaor Jeugdveurzitter en bestuurslid gewaes. Sinds veurig seizoen bin ik op de achtergrónd bezig. Ouk bin ik 11 jaor lid gewaes van Stichting Comité Kinderfeesten Venlo en bin ik vreejwilliger gewaes beej VenloStormt.

Ouk zet ik mich gaer in veur ’t goje doel: 4x meigedoon met de Bike Buddy Challenge veur ’t goje doel (o.a. Spieren voor Spieren en MA Run), ’n aantal kiere voedsel ingezameld veur de Voedselbank en met Vrindegroep ’t Mót Neet Gekker Waere ’t verzörge van ’n Vastelaoveszitting veur de minse van de Zörggroep.

Vaerdere hobby’s zien kaarte beej de Gamblers (al sinds de schoeëltied op ’t Blariacumcollege met adjudant Hans)

Kaoke beej Kaokklup de Scholk met ’n aantal Ald-Raodsleje (Rien, Leonard, Robert en Bas)

Same met miene vrind John al waat jaor meiloupe in de Venloup.

Daonaeve doon ik gaer wandele (met Saartje ózze hond) en fietse met mien vrouw Peggy en genete weej van vakanties en oetstepkes met lekker aete en ’n glaeske wien. Tiedes de meivakantie gaon ik dan same fietse met mien schoeënbroor en adjudant Marcel)

In ‘t Vastelaovesverleje vuuel optochte meigeloupe met Vrindeklup de Pongelbokse en Neet op Wintersport. Vanaaf ’t jaor det ik Sirremoniemeister woort, heb ik de Optoch meuge äöpene in ’n koets en ouk meuge aafsloete met ’t Groeët Gezelschap van de Wortelepin. Waas de enige dae dan 2x met de optoch mei móch doon.

Dit jaor meug ik nao ‘ne lange wachtied (door Corona) as Prins Ben II same met mien Adjudante Marcel en Hans ’t trio van 2023 van V.G. de Wortelepin vorme en meuge weej d’n Bliërickse Vastelaovend veur gaon.

Vastelaovend Same!

Vastelaoveservaring

• Mierdere Vastelaovesoptochte geloupe met vrindegroep  “Neet op Wintersport”
• Mien vruike Hilde is al 14 jaor lid van de jeugkemissie, dus ouk genne onbekende
• Names Seacon as Golde Gaever aktiviteite bezeuke beej de Wortelepin
• Al jaorelang ‘t Swaree en Hierezitting bezeuke met vrinde 

Laevesverhaol

Miene naam is Marcel Koppers, gebaore op 16 Maart 1965. 

Zoon van Mientje en Theike Koppers-Stikkelbroeck, breurke van Noor en groeëte broor van Bram. 

Gebaore en getoge in Tegele en met 10 jaor verhoes nao Bliërick. 

Begós in Tegele op de kleuterschoeël, daonao 4 klasse op de Aloysiusschoeël en de letste 2 jaor op de Lidwinaschoeël in Bliërick vertoef. Daonao de Maasveldmavo bezóch en heb toen mien schoeëlcarriere tot een good ind gebracht.

Nao de schoeëltied en 1 jaor deensplich bin ik aan de grens begós as declarant. Op dit moment zit ik al 38 jaor in de transportwereld waovan mier as 14 jaor beej Seacon Logistics. Iers as Operation Manager en now as Inside Sales Specialis. 

Wie weej in Bliërick zien gaon woeëne bin ik lid gewaore van voetbalvereiniging SVB en heb dao 
ouk de Hoeëgheid en Adjudant 2 , Hans, liere kinne.
Same zien weej jeugleider gewaes, det ware golde jaore.
As speuler heb ik mien 25 jäörig jubileum volgehaold.
In daen tied deej ik ouk gaer wielrenne en heb toen met vrinde o.a. Limburgs moeëiste en neet te vergaete vanoet ’t Anker de Lenterit gefietst. 
Sinds inkele jaore bin ik lid van Puur Spanje en heb ik gezamelik Ride For the Roses en Amstel Gold Race gefietst.

Op de reünie van ‘t Blariacum College kwaam ik Hilde weer taege, toevallig ouk ‘t zuske van d’n Hoeëgheid. Hilde waas veur mich gen ónbekinde, in d’n tied det ik iddere zondaag op ‘t voetbalveld staond, same met Adjudant 2, waas Hilde actief beej ‘t dameselftal en genote weej met ós dreej van ‘n drenkske en hepke tot de kantine sloot.

Weej zien same gaon woeëne op de Ottostraot in Bliërick en dao woene weej nog steeds.
Ondertösse is ózze zoon ‘t hoes oet. 

Al jaore gaon ik in ‘t veurjaor wielrenne op Mallorca, de letste jaore same met d’n Hoeëgheid. 

Ouk bin ik same met Adjudant 2 jaorelang lid gewaes van vrinde zaalvoetbalteam “ Luij Knäök”  en deje weej ós bes um elke zaoterdaag in de sporthal van Baolder ‘t netje te laote trille.
Hardloupe daon ik met mien vruike. Same hebbe weej al inkele kiere de Venloup en de Marathon van Rotterdam geloupe.
Regelmaotig staon ik met ózze zoon Dion in Baolder op de baan veur ‘n pötje golf.

Bin samen met de Hoeëgheid en Adjudant 2 lid van vrindeclub de “Pôngelbôkse” 

Al jaore doon ik op dinsdaagaovend rikke met Frank, Herman en Maurice.
Samen gaon weej um de 2 jaor naor ‘t boeteland. 

Op dit moment bestaej ik miene vreje tied samen met mien vruike Hilde aan wiekendjes weg en vakanties in Spanje.
Terrasjes pakke en oetaete met ózze zoon Dion en zien vriendin Keely daon weej ouk gaer.
Aafgeloupe oktober zien weej met 15 vrinde en vriendinne naor Puglia  gewaes, wao weej hebbe genaote van de moeëje umgaeving Brindisi, Lecce en Alberobello.
Haopelik kinne weej det nog lang same doon. ‘t Volgende oetstepke steit al op ‘t programma. 

Met dees vrinde en vriendinne  viere weej altied Vastelaovend en kieke weej al jaore onder ‘t genot van ‘n hepke en drenkske same de optocht beej Ald Prins Marcel II en zien vruike Lilian op de Ruysstraot.

Ik kiek d’r nao oet um same met d’n Hoeëgheid en Adjudant 2 dit jaor d’n Bliërickse Vastelaovend  veur te meuge gaon onder ‘t motto “Weej gaon los!” en det zulle weej zeker doon

“ Vastelaovend same” 

Marcel