Kaartverkoup maondaag 31 jannewarie van 19.00 wies 21.00 oor in 't Raodhoes.
In 'nne werkelik prachtig versierd RAODHOES is, tiedes ’t oëtverkochte Swaree, Prins Eric II met zien Adjudante Roger en Ruud oëtgerope as Hoëglöstig Trio 2010 van 't Bliëricks Vastelaovesgezelschap 'de Wortelepin'.
Bezeukers krege 'n onderhaldend veurprogramma aangebaoje en daornao waas de buun veur 't Groët Gezelschap van Vastelaovesgezelschap 'de Wortelepin'.
Vors Carotius VI wis de spanning d'r, wies op 't leste moment, good in te halde. Beej 't prinseraoje maar ouk in de wandelgang zien d'r maar weinig minse gewaes die de naam Knorr hebbe geneump as meugelike kandidate um in 't Trio deil te neme.
Prins Eric II met zien Adjudante Roger en Ruud woorte as 'n 'Knorr suupke' geprissenteerd, zeej kwame binne in 'nne groete soepkaetel en in ’T RAODHOES woort 't mingselke gebrouwd.
't Hoëglöstig Trio is door de Swaree gaste good óntvange, de Hitzacker Boeben ginge oët eur daak en ouk andere Swaree bezeukers waren erg enthousiast euver 't Trio.
Nao ’t oëtrope woort d'r wies in de late eurkes fiës gevierd in ’T RAODHOES met meziek van 'Die Powerhose', 'Minse Kinder' en 'De Vinylboys'.
De bezeukers van 't Swaree hebbe zich geweldig good geamuseerd, dit waas 'nne hiele gezelligen aovend.
