“Bliërick Blief Boëte” is neet mier weg te dinke in de Bliërickse Vastelaovend. Nao dreej jaor kinne weej röstig spraeke van ’n evenement in Bliërick det verschrikkelik good is aangeslage beej de Bliërickse Vastelaovendvierder. De derde editie gehalde op ’t plein veur ’t schitterende nieje Raodhoes haet weer beweze det de Vastelaovend in Bliërick laef! Nao de, traditioneel geweldige Groëten Optoch, struimde ’t plein veur ’t raodhoes vol met Optochdeilnemers en toeschouwers die vanaaf det moment ’n prima programma krege aangebaoje! ’t Programma zoot good inein, want toet ’t ind bleve de minse op ’t plein in Vastelaovendstumming, waodoor zoëwaal in ’t Raodhoes as daoboëte ’n paar doëzend minse lete zeen det de Vastelaovend in Bliërick volop laef en toekóms haet!!
Ouk kómmend jaor zal Bliërick Blief Boëte weer plaatsvinde veur ’t Raodhoes alwao vanaaf 14.00 oor ’n drenkske en ’n hepke kinne waere genuttig. Vanaaf 17.00 oor zulle Joekskapelle, de 4 winnende liedjes en znderen toet 21.00 oor garant staon veur ’n echte Vastelaovend-stumming. Laote weej same d’r weer ’n geweldige happening van make. Bliërick verdeent det, de Vastelaovesvierders verdene det, de Vastelaovend verdeent det! Bliërick Blief Boëte: geej ouk?
